العودة   منتدى حسبتك لي > شعر - قصائد - خواطر - نثر - قصص - شيلات جديده - بيت القصيد > قصص - حكايات - روايات > روايات كامله ، روايات طويله ، روايات رومانسيه ، روايات حزينه ، روايات جديده

روايات كامله ، روايات طويله ، روايات رومانسيه ، روايات حزينه ، روايات جديده تحميل روايات بصيغة الوورد ، تحميل روايات بالتكست ، تحميل روايات بالجوال

إضافة رد
قديم 2015-01-18, 03:17 AM   #7
دلـ،ـع حَسبتّك . ♡
الصورة الرمزية وينــــــــــــك حبيبـــي
 
وينــــــــــــك حبيبـــي has a spectacular aura about وينــــــــــــك حبيبـــي has a spectacular aura about وينــــــــــــك حبيبـــي has a spectacular aura about وينــــــــــــك حبيبـــي غير متواجد حالياً

 

البارت السادس
.
.
.


بعد العواصف الي صارت من الي ينقال انهم اهلي وعيال رجل امي هدأت الاوضاع

ورجعنا لحياتنا قبل انا وامي لاهم ولا كدر ارتحنا...

ما ادري هو انا وامي حطينا النقاط على الحروف والا الهدوء الي قبل العاصفه...!

.

.

.

اليوم حفل زواج صديقتي ريم الله يوفقها...,

واكيد انا وامي اول المعازيم..,

تجهزنا علشان نحضر العرس انا وامي...

طلعنا للعرس مع سواقنا وشغالتناواكيد محرمنا نمر ولد ام ابراهيم...,

ما نسانا حتى يوم عرس اخته فديته..,

صار رجال عمره 11سنه ...’
.
.
.

ام عوق بـممازحه له\ ليتك يانمر كبير كان زوجتك عوق وصرت وليدي صدق..

نمر\يا خاله وش ابي بعوق عوق عجوزاكبر مني بسنين...!

لكن وعد يا خاله اذا كبرت ان شاء الله وفقني الله وحققت حلمي وصرت ضابط قولي آمين يا خاله...,

ام عوق بضحك\آمين يا النمر عسى الله يوفقك ويخليك لعويناتن ترجيك...’

آردف نمر با افتخار \واعرست وجاتني بنت ان اسمها عوق..

عوق بتحذير \ نمر لا تورط عمرك اسمي شين ..!

نمربثقه \ كلام رجال وتشوفين يا عوق..,

عوق بـ ضحكه \ اجل انا اذا ربي كتب لي زواج وجالي ولد تراه سميك دامك عايفني ما تبيني...,

.
.
.

وهذا حالنا مع نمر كنه ولدنا نسولف وناخذ ونعطي معاه على اني تغطيت منه من يوم كان عمره عشر سنين..,

هو طفل لكن بسم الله عليه عقل شايب..

ودايم يحاول يبين انه اكبر من عمره..

حتى او ل يوم تغطيت عنه تعلمني ريم..!

تقول نمر فرحان انتس تغطيتي منه الدفش يحسب غطاتس عنه خلاص كرت العبورلمرحلة الرجوله...!


.

.

.


وصلت للعرس انا وامي واول مره احضر عرس بعد ماعرفت حقيقتي ..,

حسيت الكل يناظرني ما ادري وش سر ها النظرات ...!؟

يمكن ناس مشفقه على حالي يوم يشوفني انا والعجوز واكيد الكل داري بحقيقتي..!

او انهم يفكرون وش راح يكون مصيري لو اني فقدت امي الله يحفظها لي..

واحتمال يتهيئ لي ان العيون علي والا محد درى عني ..!

.

.

.

عند ام ابراهيم
.
.
.

عوق\خالتي ابي اطلع اشوف ريم..,

ام ابراهيم بقلق \ترى من اليوم تسأل عنتس متروعه البنت تكفين هديها يا عوق...!

عوق\ ابشري ياخاله...!!

واطلع مع ميعاد اخت ريم..

وانا امشي اسمع سوالف الحريم الي امر من بينهن..

ما قلت لكم صار التسمع هوايه عندي...!

الي تقول ياخسارة زينهاتلقين امها اجنبيه ...!

والي تقول ليتها تهديني شنطتها...!

والي تقول محد لقاها الا هي...!

والي تقول ابوهامن الكباريه ..!
.
.
.

سبحان الله محد راضي بقسمته...!

انا ما ابي لازين ولافلوس...!

ابي بس اكون معروفة نسب..؟

ويقال هذي بنت فلان الفلاني...

ماهو اسمي من اوله الي اخره اسامي مصففه...!

وممنوع احط ال التعريف فيها ..!
.
.
.
طلعت عند ريم وتناسيت كل الي سمعته ابي انبسط مع صديقة عمري..

دخلت عليها وانبهرت فيها ريم تغيرشكلها مره..!

التسريحه والطرحه وفستان الفرح غيرو شكلها..!
.
.
.
عوق بمزح معها\ شكلي غلطانه اسفه ...؟

انا صديقتي ريم اليوم عرسها والظاهرغلطت با العنوان..؟

ريوم شينه والي اشوفها قدامي تبارك الله قمر..!

ريم بعصبيه\ وجع عويق جدري هندري انا ريم ..!

عوق تضحك\ لا اجل دام فيها جدري هندري فا انتي ريم بنت مسلط محد يقولها غيرتس..!

ناظرت صدر ريم ما كانت لابسه شي ...!

انا طلبت منها طقم زواجها انا الي بشتريه لها هديه على ذوقي بما ان فستان زواجها اخذت رأيي فيه وكان لي دور با اختياره ...,

اخذت لها طقم الماس ناعم...,

يناسب لون فستانها الابيض ...

لبستها وطلع عليها خيال ريم بشرتها خمريه وكل شي يناسبها سبحان الله...!

اشوف مرات عليها الوان تلبسها اوارواج تحطها واذا اشتريت نفس اللون ما يناسبني على ان بشرتي حيل بيضا..

وهي ذوقها راقي اعجبها الطقم ...’

ريم با امتنان وخجل\ مشكوره عوق شكله غالي والله ماله داعي...!

عوق \هو غالي غالي لأن الغالين يستاهلون اكثر بعد...,

ريم منحرجه \ما توقعت بيكون الطقم الماس ..!

اكسسوار ويفي با الغرض لو تدري امي بتزعل علي اني كلفت عليتس ..؟

عوق \ اقول بس عن الهبال انتي كم مره بتعرسين...!!

هي ها المره وان شاء الله ياريم يا بنت خالتي نوره بعد عمرآطويل من بيتس لقبرتس..,

ريم بضحك \هذا دعوة امي يا غشاشه دايم تقولها ..!

عوق بمزح \هذه الجمله كنايه انتس تقعدين عند رجلتس لين تفطسين ..

ريم بتهكم \اشتغلت اللغه العربيه الا كلمة تفطسين هذي بعد مصطلح مسروق من امي ..,

عوق بضحك\امتس تحت روعتني تقول ريم ما ادري وش فيها متروعه هديها وانتي بسم الله عليتس مافيتس الا العافيه..!

ريم\اجل وش تبين اضحك وامزح معها تبين اهلي يمسكونها علي فرحانه با العرس...!

خليني امثل الحيا شوي ..,

ريم بخوف\البلا مار البلا يا عوق الحين امي بتجي وتهاوش من اليوم ناشبه لي هي وخالتي ام جزاع...,

يبوني البس طقم ذهب وانا ما ابي...!

ريم بترجي \اقنعيهن وقولي الذهب ما يصلح ليلة العرس الذهب ماعاد يلبسونه الا في الزواره...

عوق بتهكم\ زين يا المستحيه بعد تعطيني خطة اقناع امتس وخالتس..

وعلشان الخطه تضبط اذا شفتيهن اقعدي تنافضي من الخوف لين ينسون الذهب..!

ريم بمكر\ ابشري بس اخاف من كثر ما انتفض واتهزهز حيا...!

ينكسر الكعب وثم عاد ابلش الرجال طوله مترين واختس مامن طول يحسبوني بنته يسحبها وراه... !!

.
.
.

ريم الي يجلس معها ينسى الدنيا عليها تعليقات ما ادري منين تخترعها الله يسعدها..

جا وقت زفتها ونزلت بسرعه لبست عباتي وتغطيت وجلست جنب امي..

ودخلت ريم وانزف معها زوجها الفرحه باينه بعيونها...,

واخيرآ شفت حلم ريم الي تحلم فيه ليل ونهار...!!

شكل زوجها عادي جدآ لكن ريم كانت مصورته لي غير سبحان الله...!

حتى طوله وسط وبشرته حنطي ...,

ضحكت على ريم الله يوفقهايوم اتذكر سوالفها ايام خطبتها ..!!

تقول لو تشوفينه يا عوق يهبل طول وبياض وسكبه مافيه شي يعيبه الا اسمه جزاع ..؟!

صدق من قال ؛

وعين الرضا عن كل عيب كليلة..!

.

.

.

من يوم زفوا ريم وطلعت من الحفل مشيناانا وامي ورجعنا لبيتنا امي ما تحب السهر يتعبها...!

دخلنا بيتناوانفجعنا انا وامي لقيناه مقلوب فوق تحت بغيابنا حراميه داخلين البيت ...؟

وقاصدين غرفتي وغرفة امي با الذات ..؟!

وقالبينهن فوق تحت ..!

ومكسرين الدروج فاتحين خزنة امي ودولاب امي مكسوره ابوابه..!

لأن امي دايم تقفل دولابها با المفاتيح ومحذفين الملابس ..؟

وغرفتي مفتحه الدواليب وكتبي مرميه على الارض ولبسي محيوس ..؟!

وباقي غرف البيت مافي شي يذكر تفتيش بسيط...!

ام عوق بغضب \ وش الي قلب بيتنا وش يبي الي جاي بغيابنا..؟

بلغي الشرطه يا عوق...,

عوق بتمهل \ اصبري يمه اخاف بلاغ الشرطه يفتح علينا ابواب مسكره انا كني عرفت من سوى ها السواه...؟

ام عوق بحده\ من يا عوق..؟

عوق بتفكير\ ما في احد له مصلحه الا سعد وسالم ..؟

يمه الي داخل بيتنا راسمه رسم ويعرفه ...,

ولا دخل وفتش صح الا غرفتي وغرفتس ولا اخذ لافلوس ولا ذهب شوفيهن بمحلهن ..!

هذا يبي شي غير وبعدين داخل مع الباب ماهو كاسر الا باب غرفتس علشانتس قافلتها..

ام عوق بغضب\عطيني التيلفون ودقي على بيوتهم بوريهم الي ما يستحون يدوسون حرمة بيتي كل هذا طمع ..!

عوق\ يمه انتي يشورونتس رجال وحريم وياخذون برايتس ما يطلع منتس ها الراي..!

الحمدلله ربي سلم ها المره وبناخذ حذرنا..,

ام عوق\ بسرعه شوفي العقود والصكوك وينها لايكون اخذوها..؟

عاجزين عن الشكاوي والاالحكومه مايروح عندها شي لكن يبي لنا سنين نطارد وراهن ...!

عوق بتهكم \ ومن قالتس انهم اخذوها با الحفظ والصون وانا بنت الوضيحي ..!

صرفت الخادمه الي تنا فض من دخلنا البيت وشافت الحوسه وكن بقلبها بلا واسكر الباب وراها..,

ام عوق بدهشه\ وش بلاتس سكرتي الباب افتحيه...؟

عوق\ اسمعي يمه الي دخل بيتنا دخله بمفتاح للبيت...!

بتأكد من الي طلع مفتاح بيتنالهم وخلاهم يدخلونه..؟

ام عوق\ اتركتس من الهرج الصكوك وينها ..!

عوق\الصكوك اخذتها من اخر مره جو فيها سعد وسالم..,

واطلعوازعلانين خفت منهم..,

واحطهافي شنطه مع كتب لي قديمه للكليه وبا المخزن لا من شاف ولا من درى اوراق مع ها الاوراق ...!

ام عوق بفرحه واعجاب\ ما دريت انتس جنيه..؟

عوق\ تربيتس يا الوضيحي ..,

يلعب عليا يحسبني من ملاعيبه ... ما يدري اني على الناس لعابه.

ام عوق بضحك \يا الله يا اللعابه هاتي الاوراق ابي اتطمن عليها..,

عوق \ بروح شوي وارجع لتس با الاوراق..,

قلبي قارصني من الشغاله انها هي الي دخلت الحراميه بيتنا يعني من بيكون غيرها وجها ماهو طبيعي ..!

عوق بحده\توتين جيب لي التيلفون بسرعه..

وتروح تركض تجيبه ..,

عوق ترفع السماعه ب تمثيل متقن..؟ \ليه يا سعد يعني هي الي عطتك المفتاح اهاااا خلاص بنبلغ الشرطه مع السلامه..,

الخادمه منهاره تصيح \ عوق انا اقول الحقيقه لكن شرطه لا يكلم..

آردفت عوق\ قولي بسرعه ولا تكذبين..,

الشغاله\ طيب عوق من زمان يجي بابا سعد وباباسالم وانتي في كليه وكرمام مافي موجود..,

قال باباسالم توتين يبغى ندخل بيت جوا في ورقه عند ماما كبير وفي ختم صغير سوا سوا مفتاح ..؟

قلت انا ادخل ماما كبير موجود مافي نوم..!

قال لاااا

انا لازم ادخل وماما مافي موجود..؟

جيب مفتاح وختم صغير والا بعدين انتي وزوج سفر باباسعدهوكفيل ماهو ماما كبير..؟

انا خوف عوق بعدين اناسفر وكرمام..؟!

انا ياخذ مفتاح بيت بس ختم ما يقدرما يعرف وين و بابا سالم بسرعه اخذ مفتاح و رجع..,

ويقول هذا تيلفون بيت انا اذا ماما كبير وعوق برا على طول كلم...!

انا اليوم علشان كلوا يروح برا زواج ماما نوره كلم باباسالم يجي بيت مافي احد..,

عوق\ خلاص توتين انتي شغالة ماما وضحى صح وكرمام زوج انتي سواق ماما وضحى...,

مين يعطي راتب ماما وضحى والا بابا سالم وباباسعد..؟

توتين\لا ماما وضحى..!

عوق\ خلاص اجل ما يسمع الا كلامي انا وماما وضحى بعدين انتي كويس وفي خوف من الله ليش يسوي كذا...؟

وتقعد تصيح وتصب من ها الدموع والله عالم هي دموع صدق والا تماسيح

واروح للمخزن واطلع شنطتي القديمه الي فيها الاوراق..,

واجيبها عند امي الي تصلي على كرسيها..,

خلصت امي صلاتها ..,

عوق\ هذي الاوراق شوفيها ...

وتطمنت امي ورجعت الاوراق بشنطتي ..؟

عوق\ يمه حشرت الشغاله وطلعت هي...!

سالم مهددها يسفرها هي وزجها والضعيفه خافت منه يبي الا وراق وختمتس ..,

ام عوق\ لازم اجل ناخذ حذرنا منهم ونسفر الشغاله...!

عوق\ لا بالله ماراح نسفرها...!

الشغاله ماعليها وعارفه شغلنا ولها سنين معانا...,

خليها تقعد شوكه بحلق سعد وسالم هي الشاهد الوحيد على انهم دخلوا بيتنا بغيابنا ..,

وبعدين خلاص وش الي يحدنا نخلي الشغاله والسواق با اسم سعد والا غيره ..!

انتي ارمله ومستحقه سواق وشغاله يا ميمتي الي بنجيبهم ها المره بيكونون با اسمتس ونفتك من منة خلق الله ..

ام عوق بذعر \يا بنت الختم وينه لايكون اخذوه...!

عوق بضحك\لا يمه شوفية بشنطتس الصغيره الي فيها مواعيد المستشفى

نابشين الدنيا كلها واعماهم الله سبحانه عن شنطتس الي معلقه على الشماعه الي قدام وجيهم ماحركوها من محلها..!

ام عوق\ عويق يمي شوفي الختم وخوذيه وحفظيه عندتس الدنيا وحالها والله يا بنتي ما يندرى باتسر وش يصير...!

محد ضامن عمره وهذولا خلاص انهبلوا الله يكفينا شرهم...,

عوق با اشمئزاز\والله ان ساس البلا سالم والا سعد خبلآ يدربي راسه وراه...!

اردفت عوق \يمه ترى الختم ماله اهميه بدون الوكاله لازم مع ختمس الوكاله...

والوكاله انتي ملغيتها يعني تطمني ما يقدرون يسوون شي...!

ام عوق \انتي خوذي الختم واخفيه وما عليتس الحذر زين..!

عوق\ يمه بكرا بنغير كوالين الابواب بمفاتيح جديده وش رايتس...؟

ام عوق\وازين راي بعد العصر خوذي نمر واطلعي انتي وهو واشتري مفاتيح..,
.
.
.

اخذت ختم امي علشان اطمنها و تركتها ترتاح...,

دخلت غرفتي منهد حيلي من التعب فكرت وين احط الختم...؟!

ما لقيت الااني امسك شنطة يد من شناطي القديمه وافتحها من داخل واخيط عليه..!

امي نادرآما تستعمل الختم واذا بغته طلعته لها زيادة اطمئنان لها...!

اهم شي الاوراق خايفه من سالم السوسه وسعد يحاولون با الشغاله وماهو كل مره تسلم الجره..؟
.
.
.

اليوم انبسطت بزواج ريم لكن احس بضيقه ما ادري وش سببها..,

على كثر ما ضحكت انا وريم على كثر ما خفت من ها الضحك..!

سبحان الله الايام تركض وتتفلت من ايدينا بدون مانحس ..,

اليوم زواج ريم وقبل فتره زواج هندصديقتي,وقبلها بدريه.. ,

فتره وكل صديقاتي يتزوجون ويبنون لهم حياه خاصه زوج واطفال وحموله..,

الا انا ..الا انا طيب وش ذنبي انوصم بها العار..!

ليه امي ما اجهضتني وريحتني والا اهلها ليتهم ذبحوها وانهو حياتي معاها..,

نجود زميلتي سمرا ودايم تتذمر من لون بشرتها تزوجت والحين طالعه شهر عسل..,

بدريه مريضه عندها القلب وهذا هي تزوجت وعندها ولد..,

وحتى عهود الي كانت مقومه المدرسه ومقعدتها مشاكل وبلاوي فصلوها اهلها يقولون ماهي فالحة بالدراسه..!

والحين متزوجه من يوم فصلت زوجها ابوها ولد عمها وفاتحه بيت وعندها اطفال..,

مهما كانت حياتهم سعيدات اوتعيسات الا انهم انفصلوا عن اهلهم واستقلوا بحياتهم الا انا ...!

اللهم لا اعتراض ولا حسد لكن انا بعد من حقي اعيش مثلهن اتزوج واكون اسره..,

بقعد طول عمري وحيده وش ذنبي ادفع فاتورة غلط غيري ..!!

لاحول ولاقوة الابالله...

صحيت الصباح وانا البارحه ما ادري متى نمت ...!

لكن الاكيد اني نمت بعد ما بكيت وطلعت كل الي في قلبي من عيوني ...

قمت مرتاحه على الرغم من ان عيوني بتفجرحمرا من كثر ما بكيت البارحه..,

بكاي البارحه ماهو حسد لريم والا زميلاتي ولاحتى غبطه..,

الله يوفقهن لكن كان بكى على حالي الي محرومه من ابسط حقوقي ..,

اني اكون زوجه وام يعني عشت غريبه وبموت غريبه..!

امي عاشت طول عمرها وحيده جربت الزواج مرتين ولا جا لها عيال..,

لكن تظل لها ناس واقارب يذكرونها الحين با الخير وبعد عمر طويل يترحمون عليها لكن انا من يذكرني..,

من طلعت لدنيا وانا اتجنب الغلط قبل ادري بحقيقتي وبعد مادريت..,

ولا سويت حركات البنات ولا حتى عشت مراهقتي..,

استحي حتى من كلام مرات البنات يمزحون فيه ...,

اقصى ما سويته اني مره في الثانويه طلبت من ريم تشتري لي شنطة مكياج..,

واشترتها لي ومعاها مجلات تعلمني كيف اتعلم اصلح مكياجي لنفسي..,

وصرت استغل الفرص اذا نامت امي اتعلم كيف ازين نفسي ..,

وصرت خبيرة مكياج واستشواروتسريحات بدون ما احد يعلمني..,

صندوق اسراري ريم اطلب منها الي ما ابي امي تعرفه و ما اقدر اجيبه وامي تشوفه..,

المجلات الي تشتريها لي ريم وادخلها بيتنا بدون علم امي كانت بمثابة معلم لي..,

شعري الطويل كنت دايم اخترع طرق ازينه فيها ..,

امي عندها عيب وشق جيب المكياج والا قص الشعر..!!

ماهو مسموح لي الا بكحل والا روج ويالله توافق بعد ما توسطت لي خالتي ام ابراهيم..!

واقنعتهاان كل البنات بعمري يحطون مكياج ويتزينون وعوق وش ينقصها عنهن ..؟!

اقتنعت امي وهي دايم فديتها تنتقدني اذاشافتني حاطه روج..!!

تقول عويق انتي ماكله كبدة خروف نيه..؟!

اقول لا يمه هذا رووووووج حمره فديتس ...,

محد من معارفي والا صديقاتي خاتمه القرآن حفظ الا انا..,

عسى ربي ينفعني فيه في آخرتي ويسامح الي جابوني ورموني..؟!

.
.
.

بروح اشوف امي البارحه تعبت من عرس ريم لحوسة بيتنا..,

طلعت اشوف وينها...؟

اوووووه صح اليوم الجمعه احلى واغلى يوم على قلبي انا وامي ..!

وعادت امي الي ما تخليها اول توقف عند باب بيتناالحين لا تحط لها الشغاله كرسي تتعب من الوقفه..,

يجونها اطفال حا رتنا وتوزع عليهم ريالات...,

والفرحه اشوفها بعيونهم بشي بسيط..,

جلست انا وامي على غدانا...,

ام عوق با استغراب\ ماهي عوايدتس تصحين متأخره..!

عوق \ مانمت الا بعد ما صليت الفجر..,

ام عوق بأمر\لا تسوهرين الليول وانا امتس السهر الي ماهو في صلاه والا ذكرلربتس ترى ما به غير يجمع الهموم..

عوق بوجع\لا يمه الله لايجيب الهموم...,

آردفت عوق بحسره\ يمه ما شاء الله كل صديقاتي اعرسن .. !!

ام عوق تضحك\وانا اقول عيونتس وراهاحمر اثاري بنيتي البارح ليلها ليل سراي..!

عوق با استغراب\ يمه وش معنى ليل سراي ..!؟

ام عوق با ابتسامه\معناه كل ليله يمشي علشان يوصل للي يبيه مثلتس كل ليلتس تفكرين..

عوق با ارتباك\لا يمه ماهو قصدي لكن خلاص بنتفرق انا وهن وانتي ما تحبيني امشي مع المتزوجات..!

ام عوق \ هذاك اول يومتس صغيره الحين انتي كبرتي وتميزين الكلام الي يصلح من الي ما يصلح..,

وبعدين وانا امتس وش انتي مستعجله عليه ..؟

لاتخافين ان مامتي بتعرسين بس لاتستعجلين رزقتس...,

اردفت ام عوق بثقه\الله ما شق فم سبحانه الا هو كافلآرزقه...,

ويمكن ان حظتس ازين من حظوظهن كلهن..,

عوق تتنهد بوجع \الله اعلم ..!

ام عوق \والله كريم بعد و ماهو كل من اعرست ارتاحت كم وحدة قالت يا ليتني ماقلت ياعرس ..!

ام عوق بتساءل\الا رويمة وراها ماهي لابسه ذهب غير سلسله ما شفتها الا يوم اخذتني نوره اسلم عليها ..!

عوق بضحك \ يمه موضه..!

وضحه\امحق موضه زين العروس بذهبها ماهو كنها بزير لا بسه ها لي يتلامع ..,

هذي امي ثوابتها ما تتغيرعندها ثقه وامل ان بكرا بيكون اجمل ولا تسمح لليأس يدخل حياتنا..!
.

.

.

صرت احس الايام تركض بسرعه انا اخر ترم لي با الكليه..,

وتشعبت صداقاتي حيل بحكم المواد الي اخذها واختلاف القاعات وزواج صديقاتي وانشغالهم بحياتهم ...,

ومن ضمنهم اقرب صديقه لي ريم انشغلت بزوجها ومولودتها الجديده ودراستها وابتعدنا عن بعض ...,

تعرفت على بنات ومن ضمنهم وحده ملتزمه وعلى خلق اكثر محاضراتنا انا وهي مع بعض في يوم جاتني قالت عوق ابغاك بموضوع..!؟

عوق با اهتمام\ خير!

البنت بتردد\ ندور لأاخوي على زوجه وهو رجال ملتزم ويبي وحده ملتزمه مثلك وانا وامي وخواتي رشحناك له ..,

عوق با استغراب\وامك وخواتك وش عرفهم فيني..؟!

البنت\خبرتهم عنك و جو هنا للكليه شافوك واعجبتيهم انتي وش رايك..!؟

عوق با ارتباك\ــ ــ ــ ــ

.

.

.

نجوم اليوم كانت من نصيب؛

نجمه للغاليه نوف توقعت في البارت الرابع زواج بنت الجيران والحراميه عيال اخو العجوز الي انكشف الستار انهم عيال زوجها المتوفى

نجمه للغاليه الهدف قالت ان البيت الي بيدخلون الحراميه بيت ام عوق تستاهلين يا الهدف

.

.

.



(كلمه اخيره )


قال ابن القيم رحمه الله :

لو كَشف الله الغطَاء لِعبده و أظهر له كيف يُدبّر له أموره
و كيف أن الله أكثر حرصا على مصلحة العبد من نفسه و أنه أرحم به من أمّه
لَذاب قلب العبد محبة لله و لتقطّع قلبه شُكرا لله..’

فسبحان المدبر..


الي الملتقى قريبآبأذن الله

  رد مع اقتباس
قديم 2015-01-18, 03:19 AM   #8
دلـ،ـع حَسبتّك . ♡
الصورة الرمزية وينــــــــــــك حبيبـــي
 
وينــــــــــــك حبيبـــي has a spectacular aura about وينــــــــــــك حبيبـــي has a spectacular aura about وينــــــــــــك حبيبـــي has a spectacular aura about وينــــــــــــك حبيبـــي غير متواجد حالياً

 


البارت السابع

.
.
.

عوق با ارتباك\ازهارانا عندي ظروف تمنعني من الزواج الحين..!!

ازهار بتردد\احنا عارفين ظروفك اناماكلمتك الا بعد ما سألناعنك...؟

عوق بدهشه\بس انــا..

ازهار بمقاطعه \ لا تقولين انا ولا شي استخيري وشوف راي امك ..,

ترى اخوي مصر عليك وشاريكي وراضي بوضعك واحنا حموله معروفه اسألو عنا..

عوق\ يصير خير عطيني مهله افكر في الموضوع والله يقدم الي فيه خير...,
.
.
.

فاجأني كلامها اول مره احد يقولي ها الكلام صريح...,

كثير بنات لمحوا لي عن اعجابهم فيني وانهم يتمنون يخطبوني...,

لكن كنت على طول ما اعطيهم فرصه يتمادون..!
.
.
.
رجعت للبيت ودخلت لغرفتي وفي بالي كلام ازهار..!

معقوله في ولد حموله وناس معروفين يخطب بنت مجهولة النسب ..؟!

الشباب يسافرون للخارج دول اجنبيه وعربيه ويتزوجون من جميع الجنسيات ولا يعرفون شي عنهن...,

وما سمعت في يوم ان احد تزوج من بنات الرعايه يمكن في حالات لكن انا ما سمعت...!؟

وكثير سألت في احد معروف نسب تزوج من بنات الرعايه او العكس لكن مافي احد عطاني امل..!

هذي فرصتي وهو مثل ما تقول ازهار عارف بوضعي وراضي ومصر علي ...!

والفرصه ماتجي للأنسان الا مره وحده بستخير واشوف راي امي ..,

ياربي عسى ما يفاجئني شي ويوقف بطريق ها الزواج يعني بتزوج معقوله...!

ومطوع بعد مثل ما كنت اتمنى يعيني على ديني ودنياي يمه قلبي احسه بيطير من الفرحه ...,

انا اعرف ازهار لكن ما اعرف اهلها لوعطتني اسم اخوها الكامل احتياط اذا وافقت امي نسأل عنه..!

بس الله يسترمن سعد وسالم ماهم هينيين لكن مدام امي على راسي ماعلي منهم اهم شي امي تقتنع..!

يا ليت ازهار قالت لي وش اسم اخوها وانا استحيت ما سألتها بكرا ان شاء الله بسألها عن اسمه..!

ام عوق بدهشه\عوق بسم الله عليتس وش بلاتس تضاحكين روحتس ..!

عوق بخجل\ هلا يمه لا بس تذكرت سالفه با الكليه ..؟!

اردفت عوق با استغراب\الوضيحي داخله غرفتي ومنورتهااكيد فيه شي..!؟

ام عوق \لا والله مافي شي بس استغربت من جيتي من الجامعه دخلتي غرفتس ولا طلعتي قلت اكيد بنيتي فيها شي..

ودخلت الا انتي تشرين بيدينتس وتضحكين وماحولتس احد...!

ام عوق وهي خارجه من الغرفه\قومي تغدي وارقدي ريحي عمرتس قبل الصلاة...,

طلعت ورى امي للغدا وما ادري كيف افاتحها با الموضوع مستحيه ومنحرجه منها ..؟!

.
.
.

على سفرة الغدا
.
.
.

عوق بتردد\ يمه تتخيلين يجي يوم وانخطب واتزوج..؟!

ام عوق بضحك \الي ربي كاتبه لتس تبين تشوفينه ..؟

عوق بممازحه \ليه يمه تضحكين والله اني اتمنى ربي يرزقني مطوع لحيته طولها شبرين ..

ام عوق با ابتسامه \عسى الله يسوق لتس رزقآ حلال هين لين ماهو على البال..,

اردفت ام عوق با استغراب\مير مهي لتس عاده تطرين العرس والله ان وراتس علم يا عويق..,

عوق با ارتباك\ لا مافي شي بس سوالف والا الي مثلي من يبيها...!

ام عوق بألم\الي خلقتس ان شاء الله ما يضيعتس وان شاء الله طاعتس لربتس بتوصلتس مواصيل الخير بس لاتعتجلين على رزقتس..,

وقمت من الغدا ابي انام دخلت غرفتي واتقلب ماني مرتاحه لازم اخبر امي واحسم الموضوع بسرعه...,

اخاف ابطي على ازهار با الرد وبعدين يتراجعون عن الخطبه...!

رجعت لأمي الي دخلت غرفتها علشان ترتاح..,

وقفت عند الباب ..!

ضحكت امي واشرت لي بيدها \ تعالي ما قلت لتس ان عندتس علم وعلمآ كبيرولا يكون وراه خطبه..!

ابتسمت لأمي\ ما يخفاتس شي يا الوضيح ..!

ام عوق \لو يخفاني شي وانا امتس كان مبطي ضايعه ..؟!

اردفت بأصغاء\هااه هاتي العلم الي عندتس ..!؟

عوق بتردد\اليوم جاتني صديقتي با الجامعه وكلمتني عن اخوها وقلت لها يصير خير...,

وهو ترى رجال ماعليه و فيه خير..,

ام عوق بغضب\ وانتي وش دراتس ان فيه خير..!

عوق با ارتباك\ اخته يمه اخته تمدحه وتقول انه مطوع ..,

ام عوق \وهو كل من مدحته اخته صار صحيح ...,

وخويتس خلينا نبدي النيه الطيبه ونقول صادقه اخوها ولا هي شايفه منه غير الزين...,

انا ما ربيتس كل ها العمر وضفيتس تحت جناحي وبسهوله افرط فيتس...!

عوق بخيبة امل\يعني اقولها خلاص اصرفوا نظر...,

ام عوق بهدوء\ما نبي نستعجل وانا امتس استخيري وادعي ان ربتس يقدم لتس الي فيه الصلاح وانا بعد بستخير...!

ياعوق انتي قلبتس ابيض يا بنتي ولا جربتي من الدنيا شي..؟

عوق با استعطاف\ بس هذا فرصه واول شخص يدق بابي..!

ام عوق \ لو على دق البيبان والله تكسرت تبيتس...!

من يوم دخلتي المتوسط وانا تخطبتس الناس مني لكن والله ما شفت فيهم الي عينه مفتحه والا كان مبطي مزوجتس..,

وحتى من الي خطبوتس سالم ولد ناصر..,

يوم جاني خاطب طردته قلت الخلا يا سالم ماخليت الحريم يهينون عوق صغيره..,

بخليهن يركبن راسها وهي كبيره...,

عوق بدهشه\يمه معقوله سالم يخطبني وعياله كبري واكبر مني...!!

ام عوق\الي جاتس ماني كاذبه عليتس ...,

لا بعد جايب حرمته معه تخطب بزعم انها موافقه...,

قلت عوق ما ازوجها ولدتس يا منيره فبعطيها رجلتس ...!

وانا عارفه الهدف وانا امتس ها الحلال الي عندتس بياخذونه وعقب عيني والله ما يردتس الا دار الرعايه...,

الي ما رضيت ليله تنامين فيها وانتي رضيع ...

هم بينومونتس فيها وانتي راشده تالي عمرتس كله..!

من غير ناس واجد شي اذكره وشي ناسيته..؟

انتي وضعتس غير ولا هو اي واحد يصلح لنا وانا امتس...!!

ما قلت لتس با امر الله ما يخفاني شي..,

عوق \الله يطول بعمرتس يا ميمتي ويخليتس لي ..,

ام عوق آردفت با استسلام\خلاص بنسأل عن الرجال والنصيب مثل الموت مايدري متى والا وشلون يجي...!

وبرسل ابو ابراهيم يشوفه مااثق الابالله ثم فيه رجال فيه دين وصدوق ولا له مصلحه لا بزواجتس ولا قعودتس..,

لو انه والله يتمنى انتس ترتزقين مثل البنات..

عوق \خلاص يمه الي تشوفينه...!

اردفت عوق بحيره\لكن ليش ما كنتي تخبرني ان فيه ناس كانت تخطبني...؟

ام عوق بضحكه\ علشان ما تمرحين الليل من التفاكير..!

تشيلين وتحطين وهو شسم الي خطبني وشلون شكله..!

لا بالله يا بنتي ريحت راستس وقلت اذا جا المناسب عطيتس العلم..!

وخليتس تحاكين روحتس وتضاحكين ضلالتس..!؟

.

.

.

مر اسبوع بعد ما اخذت من ازهار اسم اخوها وكل التفاصيل عنه علشان نسأل

انا استخرت وعادي لارفض ولا قبول لكن عندي احساس انه اخر فرصه لي با الزواج ..!

وامي تقول ماهي مرتاحه...؟!

وكلمت ام ابراهيم امي على التيلفون وقالت ابو ابراهيم يبي يكلمتس..؟!

جلست عند امي اسمع مكالمتها واشوف عيون امي فيها كلام يخوف حتى قبل ما تنهي المكالمه...,

لايكون تراجعوا والا احد حسفهم انهم خطبوني ...!؟

ياكثر الحساد الي تشب نيرانها اذا سمعت طاري خطبه كنه رزقهم وأحد تعدى عليه ناسين ان مقسم الارزاق الله...!!

انا عمري ماحسدت احدولاانا طالبة شي كبير اتزوج وانسترمثل صديقاتي والبنات الي حولي يعني هذي صعبه ..,

يا ترى وش قال عمي مسلط خلى حتى صوت امي يتغير..؟!
.

.

.

وبعد ما صكت التلفون /ي يا عوق الرجال ما يصلح لنا..!

عوق بقهر\ليش ..!؟

ام عوق\ابو ابراهيم سأل عنه يقول ان الكل مدحة ورجال مستقيم وراعي صلاه ومواضب بعمله ..

عوق بترقب \طيب ؟ زين...!

ام عوق \ لكن ماخذ حرمه قبل ومطلقها...!

عوق بدهشه\مطلق ..!!!

ام عوق با اصرار\ايه مطلق وسبب طلاقه الظاهر لناس والله اعلم انه ما يبيها تشتغل..!

وهي شارطه شغلها قبل ياخذها...,

وعليه منها ورعان وجر وريعاتها منها غصب ..,

و الحين حرمته واهلها رافعين عليه قضيه با المحاكم..

بنتهم تبي تشوف عيالها وهوماسكهم عنها ...

ام عوق بوجع \يا بنتي الي ماوقف بشروط ام عياله وش تبين به...!

زود على انه قاطعها من شوفتهم هذا وش قلبه الي حارم عياله من امهم...!

عوق بوجع\ يمه انتي ماتدرين عن ظروفه طيب يمكن هي الي غلطانه ولا فهمته..!

ام عوق بتهكم\يعني انتي الي بتفهمينه..!

يابنتي السوالف بسيطه المصيبه الفعل...!

وكم سالفه سمعنا فيها وقلنا لو انا مكان فلان كان سوينا وفعلنا...,

والله اعلم انه لوكنا بمحله ضاعت علومنا ولا سوينا شي بس الي يسمع ماهو مثل الي يشوف و يجرب..؟!
.
.
.
سكت ماعرفت ارد على امي واجادلها...,

لكن بداخلي انقهرت من كلام امي ليه تضيع علي الفرصه الي يمكن ماتتكرر..!

واذا مطلق ام عياله لا انا اول ولا آخر وحده تاخذ مطلق...,

عياله بعاملهم مثل عيالي هذاانا تربيت يتيمه يعني وش صار بالدنيا...!

بعدين هو مطلقها قبل يخطبني يعني انا مالي دخل بطلاقها..

وانا ابي مطوع يعيني على نفسي واعيش معاه سعيده..

ولا يهمه انا مجهولة النسب او معروفه اهم شي عنده انا ..!

ما يحكم علي من وضعي الاجتماعي يحكم علي با اخلاقي...!

ليه امي واقفه لي ...!؟

امي ماهي دايمه لي مريضه وعمرها فوق التسعين

واشوف انها تتمسك با الحياه وتقاوم المرض على شاني

عسى ربي يمدعمرها با العمل الصالح..,

وانا توني با العشرينات يعني كم بتقعد لي امي..,

والله لو ينعطى العمر والا العافيه ما يغلى عليها..

انا عقب عينها وش يصير بحالي اذا ما تلاحقت نفسي وتزوجت وجبت لي ضنا يشيلني...

ما ابي يصير مصيري لدار العجزه بآخر حياتي..

والا اموت في بيتي واشبع موت وحيده محديدري عني ..,

حتى جنازتي يشيلها الي يدورالاجر من المسلمين واختفي من الدنيا لاحس ولا خبر ولا اثر..,

انا ادري ان امي تبي مصلحتي لكن الوقت ماهو في صالحي ..

مصيري مرتبط بحياة امي متى ماصار لها شي اذا ما تلاحقت عمري وتزوجت بتنتهي حياتي..,

وانا ما ابيها توافق غصب عنها ابيها توافق وهي مقتنعه..,

مر اسبوعين وجات ازهار تسألني ..؟

.

.

.

ازهار\عوق وش صار على الموضوع ...!؟

انتو طولتوا علينا ما رديتوا واخوي مستعجل...!

عوق بملل\ماصار شي للحين امي تسأل..؟

عوق بملامه \ازهار ليش ماخبرتيني ان اخوك مطلق..؟!

تلعثمت ازهار\ علشان كنت ابيك تفكرين با الموضوع واكيد انكم بتسألون وبتعرفون...,

ولو قلت لك من البدايه انه مطلق على طول بتسدين الموضوع ماراح تفكرين با الخطبه..,

عوق با استنكار\ لا بس المفروض كان من البدايه بينتي لي كل شي هذا زواج ماهو لعبه والا تمشيه..!

ازهار بانكسار \اسفه عوق ترى كان ودي اقولك لكن هو الي طلب مني ما اعلمك..؟

.
.
.

صدمه جديده صدمتني فيها ازهار...!

وش قصده من ها الطلب ..!!

عوق بتساءل\ ازهار وش سبب طلاقه..؟

ازهار با اندفاع\زوجته عنيده وانانيه وراعية مشاكل ومــــ...,

عوق با اشمئزاز\بس بس تكفين خلاص ..,

ازهار بتعجب\ليش ماتبين تعرفين السبب..!؟

عوق بألم\هذا ماهو سبب يا ازهار توقعت انك بتقولين سبب الانفصال شي ثاني..؟!

ازهار بقهر\انتي ما تدرين ذيك الانسانه كيف كانت تعاند وتطول لسانها على امي ..

وتبيها شغاله لها ولعيالهاوكم مره امي تبكي منها...,

عوق بملل\ خلاص بنرد لكم قريب..,

واستأذنت وتركت ازهار ...,

رجعت للبيت ودخلت على امي بغرفتها وسلمت ...,

عوق بوهن\ ما ابي غدا بنام صحيني لصلاة...,

ام عوق بحده\ تعالي لاحقه على النوم ..

لكن علميني وش الي مكدر خاطرتس ...!

من صارت سالفة الخطبه وانتي منقلب حالتس لاتجلسين معي وبس اتهربين...!

ام عوق بتساءل\انتي محاكيه الرجال وماخذه العلم من راسه..؟!

عوق بجزع وخوف \ لاوالله يمه ماهو انا الي اسويها ...,

ام عوق بحده\اجل وش لعب بحالتس ياعوق...!

ما ابيتس تندمين والا ها الحين ادق على اهله واقول تعالو ا ترانا موافقين لكن انا ما ابي لتس الا الزين...,

انا عارفه وش تفكرين فيه...!؟

والله ياعوق ان اعتراضي عليه ماهو علشانه مطلق لا يا بنتي...!

كم رجال طيب يبلاه الله بحرمة ماتستاهل مواطي رجليه..!

وكم حرمة اجوديه تبتلى برجال نذل...,

ويصير لها مثل الخشم العوج لا تقدر تدسه ولا تقدر تقصه وتصبر عليه تدور الستر والا كان لها وريعات تجلس عليهم...,

الدنيا يا بنتي دقتني دق ماني بنت البارح واعرف الادمي قبل ينطق..!

انا ارسلت عليه وجاني وشفته انا وابو ابراهيم...!

تفا جأت من كلام امي...!

عوق بدهشه \ متى وليه ماخبرتيني..؟!

ام عوق \ اليوم الصبح كنت ابي اشوفه واشوف وش هو من لحيه ...,

ان طلع رجال شد اليد ويسعدتس وافقنا...,

وان ماجاز قلنا له مع السلامه وتلقى اطيب مناوترانا على البر...,

عوق بترقب \ وش شفتي منه..!؟

ام عوق بحسره\شفت انه رجال ما يصلح لتس ...!؟

ماخلى ولا بقى على ام عياله ماستر شي ذمها عندي حتى يبس لسانه...,

ويتهدد يقول بتزوج واحرق قلبها على عيالها...,

وتحلم حلم انها تشوفوهم وخل وظيفتها تنفعها

ام عوق با استهجان\ومير يستعرض بعد قدامي يقول تدرين يا ام عوق اني علقتها سنة...!

ولا طلقتها لين خليتها تدفع كل الي عطيتها وصرفته عليها...؟!

ام عوق بوجع\مثل هذا وش ترجين من وراه...!

الرجال يبيتس عصى تأديب لأم عياله..؟!

عوق بقهر\ يمه يمكن انه هي ما قصرت فيه وصلته لقصاه...؟

ام عوق تهز راسهابألم وقلة حيله\انتي ما عاد ينفع معتس سوالف قضبتي لتس طريق الله يكفيتس شر نهايته..!

لكن وش رايتس ارسل عليه مره ثانيه واخليتس تشوفين بعينتس وتسمعين با اذنتس وعقبها انتي بكيفتس لا تلومين الا نفستس ...,

عوق بوجع \ لا خلاص الي تشوفينه صح سويه..؟

واطلع من عند امي لغرفتي والقهر ماكل قلبي ...,

ليه امي تبي تشوه صورة صالح بعيوني سبحان الله حتى اسمه فيه خير صالح ...!

الله يسامحتس يمه كان هذي افكارتس بقعد طول عمري انا وانتي متقابلات يا تدفنيني يا ادفنتس ...!

يعني يا مشاعل حتى با الحظ جنيتي علي ورثتني حظتس الاقشربقعد مثل الشجره اليابسه لاظل ولا ثمر...!

انتي ما انحرمتي من الزواج ورضيتي في بدر الاخايفه من الفضيحه..,

وانا با انحرم من الزواج علشان قاعده ادفع ثمن ها الفضيحه...,

نمت وانا خلاص مثل الي في مباراه وكان ضامن الفوزوباالأخير طلع خسران...,

صحيت على صوت الشغاله تدق الباب ...!

الخادمه\ عوق ماما يقول البسي عبايه وغطوه وبسرعه تعالي في اثنين رجال برا في مجلس...!

واقوم مرعوبه ناظرت الساعه ماهو وقت صلاة..,

لبست عباتي وقفازي اكيد هذولا سالم و سعد جايين يغثون امي..؟

والله يا سويلم لولا خوفي ان امي يجيها شي كان علمتها بسواد وجهك قبح الله اشباهك..؟!

لا ومن زين الوجه جاي وجايب منيره يسحبهاوراه تخطبني..

يرقع سواياه يحسبني بخاف منه واوافق الحمدلله ان امي فاهمتهم..!

اعوذبالله منهم تسلطوا علينا ليت امي حارمتهم كل شي وريحتنا من وجع الراس..؟!

والا مشتكيه عليهم وفاكتنا من شرهم والله الكل يشهد ان المال مال امي بس هم سرقان..,

الله اعلم وش ها المصيبه الي جايبينها هالمره اكيد مسوين شي عظيم والا مانادتني امي ..!

دخلت المجلس الا عمي مسلط...,

وامي وشخص ثالث اول مره اشوفه..!!؟
.
.
.

ام عوق\ تعالي يا عوق مامن غريب هذا صالح اخو خويتس الي خطبتس..؟!

ارسلت عليه وما قصر جا على طول ...,

عذبناه الاجودي كل شوي مرسلين عليه...
.
.
.
واناظره من تحت غطوتي شكله اقل من عادي لونه حنطي وعيونه صغار وخشمه كبير ومليان شوي لكن ملتحي ما شاء الله..,

حتى شكل عمره ماهو كبير اتوقع اول الثلاثينات لحيته سوداء...

الحمدلله اكيد امي رضت عليه وبتوافق اني اتزوجه ياربي لك الحمد..

ماهو مهم شكله اهم شي رجال ملتزم يعني برزه با المجالس

الرجال مخابر ماهم مناظر..!

يشبه لأخته ازهار لكن هي احلى منه بشوي ماهو بواجد..,

ياكبر فرحتي معقوله امي وافقت ماني مصدقه..!

قطع علي افكاري صوت امي ...!؟

ام عوق\ يا حي الله صالح..,

صالح\الله يحييك ياخاله ..’

ام عوق\هذي عوق بنتي ونبي انا وهي نعرف منك بعض الحاجات لا واسط ولا وسيط..!

صالح بفرحه\ابشري وش تبين انتي وعوق...,

ام عوق\سبب طلاقك انا عرفته منك بس ابي عوق تسمعه..؟

صالح\ سبب طلاقي مثل ما قلت لك يا خاله اليوم الصباح..!

وظيفتها ولا تحترم اهلي ومن يوم توظفت نفشت ريشها علينا...!

مهملتني انا وعيالها وفوق هذا كله تفرق بيني وبينها...؟!

تقول راتبك لك وراتبي لي ما كأنا زوجين واخرتها شرت بيت وراحت سجلته با اسمها..!

وفشلتني عند اهلي وجماعتي حرمتي شرت بيت وانا اخر من يعلم...!

لا وتقول لأمي با خذكم اسكنكم في بيتي تبي تقهرامي وتغبنها..,

صالح با استهزاء\خل البيت الي شرته ينفعها..,

ام عوق بتعجب\ هو انت دفعت فيه شي البيت ..؟!

صالح بتهكم\ ادفع ...!؟

ليه ادفع هذا الي ناقص بعد والبيت با اسمهاتموت واهلها يا خذونه غنيمه بارده...,

صالح بتحدي\ماني صالح ان ماخليتها تمشي تحاكي نفسها...,

ام عوق بتهكم\ ما شاء الله عليك ما يضيع لك حق يا صالح...!

اردفت ام عوق \وطيب ليه اخترت عوق با الذات وانت عارف وش وراها...!!

صالح بحده\ حلفت اني لأاتزوج مزيونه واحرق قلبها علشان اذا شافت حرمتي تدري مالها امل ترجع...

وسمعت من اختي تمدح عوق وزينها يوم سألنا عنهاعرفت وضعها...,

ام عوق\ اهلك دارين كلهم بوضع عوق والا بس انت...؟!

صالح\ اي نعم كلهم دارين واول شي رفضوا لكن عقب وافقوا واقتنعوا ...,

امي راحت هي وخواتي للكليه وشافوا عوق وقالوا هذي الي بتحرق قلب فايزه بزينها ...!؟

ام عوق بتعجب\ انت ما انت خايف تعايرك الناس بعدين وشلون اخذت لك وحده ما تعرف اصلها من فصلها..؟!

صالح بثقه وتحدي\ وهذا المطلوب اني اكسر خشم فايزه واهلها اني فضلت وحده مجهولة النسب على بنتهم بنت الاصل والفصل

واي سؤال تبونه انا جاهز...,

ام عوق\ لا بالله كفيت وفيت ماشاءالله عليك...,

صالح بجديه\ هاه يا خاله لكم شروط تبون تسألون عن شي ترى ماعندي لاكذب ولا لف ودوران...,

ام عوق بتهكم\ لا هو انت ماشاء الله عليك الي مثلك يطلب عليه شروط...!

صالح\لا بالله يا خاله اشرطي وكل شطروكم بنفذها ...,

ام عوق\لا تستعجل يا ابن الحلال كل شي بوقته زين ...,

والله يكتب الي فيه خير لناولك ...,

ام عوق تلتفت لعوق\ها يا عوق هذا صالح تبين تسألين والا عندتس شي والا في خاطرتس شي قوليه ها الحين...

ولا تقولين بعدين امي غشتني واجبرتني على ها الرجال...,

هذا صالح ما شاء الله عليه رجال وسند يعتمد عليه...,

عوق بشرود\ لا بقوم اروح...’

ام عوق بوجع \ اجل توكلي على الله وشوفي دروستس ازين لتس...!

طلعت من عند امي وانا مصدومه صحيح السمع غير الشوف...!

صالح ابد ما ينفع لي ولا هو الي يعتمد عليه ...!

ياربي يا الوضيح عندتس مرات طلعات كل كلمه يقولها صالح تسمي عليه وتذكر الله ...!

انا ادري انها مندبله كبدها وهو حاط رجله يستعرض بطولاته...َ!؟

احس بكآبه وحزن غير طبيعي...؟!

انا وش الي خلاني اعطي مجال لأازهار تفاتحني بموضوع الخطبه...,

ليتني ظليت على عماي ولا اشغلت فكري بشي انا في غنى عنه ...!

اهملت مذاكرتي ولا صار لي شغل الا صالح...!

اعوذبالله من الشيطان الرجيم.

اللهم دبرني فأني لا احسن التدبير.

اسمع طق عصا امي يقرب من غرفتي ودخلت علي

.
.
.

ام عوق بحزن\ وش فيتس يا عوق...؟!

عوق بحسره\ مافيني شي مشواالرجال..,

ام عوق \ايه من طلعوا جيتس ...,

عوق بوجع \ ليه يمه ناديتي صالح...؟!

ام عوق بحسره\علشان تشوفين بعينتس انا ليه ما بغيته...!

عوق\ يمه انا قلت خلاص ما ابيه الايعني تنادينه وتحرجيني وتجرحيني ..؟!

ام عوق بعطف\انا ما جرحتس انا نظفت الجرح يا بنتي لا يلم على بلا ثم يذبحتس...,

ام عوق بحنان\تحسبيني ماني حاسه فيتس وانتي تمشين مثل المسمومه..

ياعوق انتي عندي روحي الي تروح وتجي وشلون اجرحتس والا افرط فيتس...,

يا الله البسي عباتس ابيتس بمشوار بسرعه الحقيني...!!

عوق بملل\ يمه وين تبينانروح تعبانه ابي ارتاح واشوف مذاكرتي..!

ام عوق بحزم \لا حقه يالله اعجلي علي وتبين ترجعين تشوفين ماهو بس دروستس تبين تشوفين حياتس كلها...!

بكوي الجرح الي نظفته...,
.
.
.

(كلمه اخيره)


من أقوال الشيخ الشعراوي رحمه اللّه


- إذا أهمّك أمر غيرك، فـأعلـم بأنّـك ذو طبعٍ أصيـل ..
- وإذا رأيت في غيرك جمـالاً ، فأعلم بأنّ داخلك جميل..
- وإذا حافظت على الأخوة، فأعلم بأنّ لك على منابر النور زميـل.....
- واذا راعيتَ معروف غيرك، فأعلم بأنّك للوفاء خليل


• من ابتغى صديقاً بلا عيب ، عاش وحيداً
• من ابتغى زوجةً بلا نقص ، عاش أعزباً
• من ابتغى حبيباً بدون مشاكل ، عاش باحثاً
• من ابتغى قريباً كاملاً ، عاش ناقصاً


لا تستخدم فمك الا بـ شيئين فقط : هما الصمت و الإبتسامہ !

- الإبتسامہ : لحل المشكلات ..
- الصَمت : لتجاوز المشكلات

.
.
.
الي الملتقى قريبآبأذن الله

  رد مع اقتباس
قديم 2015-01-18, 03:22 AM   #9
دلـ،ـع حَسبتّك . ♡
الصورة الرمزية وينــــــــــــك حبيبـــي
 
وينــــــــــــك حبيبـــي has a spectacular aura about وينــــــــــــك حبيبـــي has a spectacular aura about وينــــــــــــك حبيبـــي has a spectacular aura about وينــــــــــــك حبيبـــي غير متواجد حالياً

 


بارت اليوم تكمله للبارت السابع..

وبنشوف وين وضحى الوفاء والطيبه اخذت بنتها عوق وكيف كوت جرحها

على فكره للعزيزه الي سألتني وش كانت سيارة ام عوق.., *ـ^

سيارتها جيب ام عوق تقول انا ما اركب سيارتكم الصغار الي كنها لعبة ورعان...!

انا ما اركب الا الجيوب الي مثل الابل عطايا الله..

ترى ما ادري وش معناته هذا كلام ام عوق..!
.
.
.

بنركب جيب ام عوق ونروح معاهم يا الله تعالوا معاي...!
.
.
.

وسالفه جديده؛



.
.
.

البارت الثامن
.
.
.

طلعت امي وانا على طول وراها...

عباتي كانت علي من صدمتي من صالح ما نزلتها...,

حاسة بمرار بحلقي ياربي امي وين ما خذتنا..!

ركبنا سيارتنا ومعنا ام ابراهيم وتوصف مكان لسواق...؟!

وصلنا بيت كبير ونزلنا كلنا انا وامي وام ابراهيم ...!

دقت الجرس ام ابراهيم وفتحت لنا خادمه وامي وام ابراهيم ساكتات...؟!

دخلتنا الشغاله مجلس وجلسنا...!

وبعدها دخلت علينا حرمه كبيره شكلها با الستينات لكن ما شاء الله عليهانشيطه وجها بشوش...,

سلمنا عليها وترحب فينا...!

واسمع ام ابراهيم تسولف عليها...,

ام ابراهيم\بشريني عنتس يا ام فواز...,

ام فوازبتوجس \ بخير يا وجه الخير...!

ام ابراهيم با ابتسامه \انتي عرفتيني ...!

ام فواز با استغراب \لا والله مير الله يحييكم...!

ام ابراهيم\اناام ابراهيم الي كلمتكم با التيلفون اليوم..,

وعطيتس خبر بنجيكم واخذت منتس عنوان البيت ..,

وهذي وضحى وبنتها عوق...!

ام فواز تبتسم\يا هلا ويا مرحبا تو ما تبارك المكان...’

ام ابراهيم\وين البنات بنسلم عليهم ...!!

وقامت ام فواز و نادت بناتها ...

دخلوا علينابناتها ثلاثه..

وحده شكلها كبري واثنين لا حريم كبار واتوقع متزوجات...!

عرفتنا عليهم ام فواز..

ام فواز تأشر على بناتها\ هذولي بناتي فايزه وهدى والصغيره ياسمين..,

يا سمين تخرجت العام وتنتظر التعيين...!

والكبيره هدى متزوجه..,

وفايزه اصغرمنها مطلقه...!

ناظرت وجه فايزه فيها مسحت حزن ما ادري ليش ذكرتني بمشاعل يوم جات لبيتنا...

معقوله يكون وجع الفقد واحد وهونفسه تشوف بكل الوجيه..!

.
.
.

ام عوق بحزم \ الظاهر يا ام فواز ما يخفاتس وش حن جايات عليه...!

وابي منكن الهرج الصحيح تقولنه قدامي انا وبنتي وربي وربكن الله يا بنات الرجال...؟

ام فواز بهدوء\لا والله يا ام عوق ماهو خافيني عطتني خبر ام ابراهيم يوم كلمتني ...!

قالت انتس ما تبين منا الا العلم الصحيح وابشري به..,

ام عوق \صالح خطب بنتي وهو رجال مطلق بنتكم ...,

وسألنا عنه واثنوا عليه الناس من امام المسجد لجيرانه لشغله ولا خلينا ولا بقينا ...,

وافقنا عليه وارسلت عليه وجاني في بيتي والرجال جاز لنا وان شاء الله نبي نجوزه مدحتوه والا ذميتوه

بس ودنا نعرف سبب طلاقه من ام عياله يمكن انكن تستصغرن عقولنا

لكن عاد تحملونا واحتسبن الي بتقولهن لله تعالى..

انا بنتي يتيمة مقطوعة مالها سند غير الله سبحانه الله لايقطعكن من رجاه..

وابي احتاط لكل شي علشان ما تندم اني زوجتها صالح...,

بنتي متردده با الموافقه تقول لازم تسمع من ام عياله السبب ..؟!

ومافي مثل زوجته هي ابخص الناس بعيوبه وان كان فيه عيبآ تبصرنا به..,

وابن آدم ما يخلى من العيوب مير عاد عيبآ عن عيب يفرق ...!

قامت الي اسمها يا سمين وناظرتني بغضب\انتي مجنونه تدفنين نفسك با الحياه...,

صالح كله عيوب اقعد طول عمري امشط شعر راسي ابيض عند راس امي وابوي ولا اتزوج ولد امه صويلح...,

هذابدال ما تطلعين انتي فيه عيب بيطلع فيك مليون عيب ولد امه..!!

انتي وش نا قصك علشان تطيحين في واحد مثله ان زعلت امه عليك حذفك ولا سأل عنك وان رضت عليك حطك على راسه..,

واصلن لاتترتجين بيوم ان ام صالح بترضى عليك الي ماكله قلوبهم الغيره مثلها ما ادري ليش يزوجون عيالهم...,

بس يعذبون بنات الناس معاهم الي عنده ام مثل ام صويلح لازم يتزوج اربع حريم اربعه علشان يقدرون عليها ..!
.
.
.

هاو شتها امها وطردتها من المجلس قدامنا...’

انا طاح وجهي من كلامها كان ودي الارض تنشق وتبلعني ولا سمعت الي سمعته ..,

خصوصآ ان ام فواز فشلت بنتها ياسمين قدامنا وبسبنا..,

ام فواز بخجل\ يا ام عوق تكفين لا تواخذونها هي شوي زعول ومنحرق قلبها على اختها ترى ما تقصد ...,

ام عوق بحده\ حنا ماحنا في بنتس هذيك..,

حنا بفايزه ونبي نسمع الصحيح منتس والا منها...,

ام فواز منحرجه\يا ام عوق انا لو وش ماقلت ماراح يكون مثل كلام فايزه..!!

هي صاحبة الشأن وشوفيها قدامك واسأليها...,

والتفتت امي لفايزه وحلفتها بالله انها تقول الصدق...,

وان انا يتيمه مالي احد ولا يجوز انها تقطع نصيبي مع صالح ولا يجوز انها تغشني...,

فايزه بحسره\يا خاله يرضيك اجيب القرآن واحلف عليه ان كل كلامي الي بقوله صدق..,

ام عوق\ لا بالله مصدقتس جيبي الهرج الي عندتس وتذكري قطع الاعناق ولا قطع الارزاق..!

فايزه بألم\ ماني مطوله السوالف ولو ابي اشرح لكن سوالف صالح ماخلصنا منها سنين...!!

وكلامي الي باقوله ماهو قصد اني ابي اغير رايكن بصالح بشين والا بزين ...؟!

لا والله بس علشان حلفتيني وهذا زواج ماهو لعبه وانتي تقولين بنتك يتيمه لو تشوف ما تكره ما تلقى الي تشكي له...!

فايزه تتنهدبحسره\صالح ياخاله ما ينعاشر وانا تورطت فيه ورطه...!

ليتني تطلقت منه ولا قعدت لين جبت منه ضنا كسر ظهري...

يوم خطبني سألناعنه والكل زكاه انه رجال راعي طاعه وظيفته زينه..,

هو من جماعتنا لكن بعيدين شوي..,

ومدحه لنا زوج هدى اختي ساكن جنب بيته ..

ام عوق با استفسار\الرجال جاني لبيتي ويقول ان سبب طلاقه منتس انتس حرمه تدورين المشاكل ودايم هواش انتي واهله...!

وعازله حلالتس عن حلاله واخرتها شريتي بيت ولا خبرتيه...!؟

اتمننين عليه وعلى اهله تبين اهله يسكنون عندتس في بيتس مقصدتس تذلينهم..؟!

فايزه بحزن\يا خاله من صبح عرسي من صالح وانا عارفه خسارتي من ربحي..

بس وش اسوي خفت اطلب الطلاق وعقب وش يفكني من اللسنة خلق الله وملامتهم ..

والله ما يبقى عيب الا ويلزقونه بظهري وصالح يطلع منها بريء..

الناس بيقولون وش شاف منها وطلقها ماهو وش شافت منه وطلبت الطلاق..

فايزه بحزن والدموع تملى عيونها\تزوجت صالح وانا كنت متخرجه لي سنه لكن ما تعينت..

ومن ليلة العرس انتقاداته لي ذبحني فيهاذبح...!

ليه شعرتس لونه كذا ليه متكلفه بجهازتس ..!؟

جبهتس كنها عريضه شوي ...,

واذا مشيتي عجله واذا سولفتي ما عمرك جبتي جمله مفيده...,

وانا اسمع سوالفه الي مثل السم...؟

مرات اطنش ومرات اردعليه بعدما يوصلني حدي...

الكلام الي تنغزني فيه امه الصباح هو يجي با الليل يكرره ..

امه على طول الخط صح ..,

وانا الي غلط عنده..!

ام عوق \لا يا بنتي لاتحطين بحظتس هذي امه تبينه يجادلهاوالا يزعلها

فايزه بقهر\انا ماقلت كذاانا كنت ابيه يوازن الامور

انا بعد زوجته ولي حق عليه الصح صح والغلط غلط علي والا عليها...,

ام صالح اكثر خراب حياتي مع ولدها بسببها هي الي مكبره راسه وكل ما قامت والا قعدت قالت

صالح ما ادري كيف رضى فيك صالح يستاهل مزيونه ماهي مثل وجهك..,

فرحانه با القرشين الي عند اهلك...,

كم ناس خطبوا صالح لكن حظك يا فايزه الكبير جابه لك..

وصالح مافي مثله وصالح وصالح....,,,

واسمع وابلع وفوق هذا بخيل فلوسه غاليه عليه...,

ام عوق با استغراب\ كلن رياله غالي عليه...,

فايزه\ ياخاله كلن رياله غالي عليه ما قلنا شي بس هو غير...!

يعطيني مصروف كل شهر ما ينعطي لطالبة ابتدائي ويحاسبني وين حطيتها فيه ...

لو امرض اقول ابي المستشفى والا احتجت علاج قالي معطيك مصروف عالجي منه..,

والا يقول المفروض منقصين من المهر الي عطيناكم وخليته عندي..!

اصرف عليك كل ما مرضتي منه ما دريت انك كل شوي تعبانه وتبين علاج..

ام عوق بتساءل\انتي مريضه قبل يخطبتس ...!

فايزه بوجع\ لا والله ياخاله التعب الي فيني من القهر الي اشوفه منه ومن امه جاني قولون ومرات يتعبني..

كل المواجيب عنده يرفضها يقول هذي كلها خرابيط ومجاملات مالها داعي..

وفوق هذاكله خالتي ام صالح الله يهديها صايره مراقب لي با الطالعة والداخلة..

وكل حركه اسويها على طول عند صالح لو امزح مزحه ما اسلم منها..

فايزه بتهكم موجع\اما تقول شفها كلمت اهلها وطولت على التيلفون تدور اخبار فلانه وعلانه...؟!

وانا من اكلم غيرامي واسأل عن خواتي...!

والااذا شافتنا جالسين مرتاحين جات شبت حريقه بينا ومشت...,

صرت اتاحشى احتك فيها...,

وخواته شايفات ولا هو معجبهن فعل خالتي واخوهن فيني لكن مافي يدهن شي..,

هو الي ماسك بيت اهله ويصرف على الكل...,

ابوه متوفي وهو الكبير...,

ام عوق\يمكن الضعيفه امه مالهاغيره وخايفة يتخلى عنهم...

فايزه\لا لها ولد اصغر منه متزوج وعايش جنبنا في بيت مستقل...!

واذا قلت لصالح ماشاء الله اخوك مستقل بحياته في بيت وهو ماعنده بزران ..

قال زوجة اخوي اشترطت بيت والا انتي اهلك ماصدقوا يزوجونك ليش ما شرطتوا..

ام عوق بتعجب \وهو صادق ورى ما شرطتي لتس بيت تحاجينه فيه اذا شفتي ما تكرهين..

فايزه بقهر\تحسبين ما قلت لأبوي اني ابي بيت..,

لكن ابوي رفض قال الرجال مطوع وكبير اخوانه واكيد ماهومقصر لو تضايقتي

البيت ما ينشرط وين تبينه يروح عن اخوانه ها الايتام..,

ام عوق \مهماكان وانا امتس المفروض انتس طالبه بيت شرعي وكاتبته عليه هذا حق من حقوقتس واذا صار ماصار تحاجينه فيه

فايزه بحسره\ما دريت يا خاله والا كان شرطت لي بيت لاهو عيب ولا حرام والزمت ابوي يكتبه با العقد..,

ام عوق تهز راسها بألم\كملي يا بنتي الي فات فات ماعاد ينفع التحسر...,

فايزه\قعدت مع صالح كم سنه وعقبها ربي رزقني بو ظيفه وهو وافق اني اداوم عادي عنده ...,

لكن عيالي اذا داومت ما ادري وش وضعهم وقلت له ...!

.
.
.

فايزه با استعطاف \صالح وش رايك بخلي عيالي عند خالتي...,

صالح بحده\امي ماهي شغاله لك هي تبي من يخدمها...!

فايزه \ خلاص اجل بيروحون عند امي واخر الاسبوع اروح اجيبهم ...,

صالح بتهكم \خير ان شاء الله تبين تحرميني من شوفة عيالي كل يوم..!
.
.
.
رفض رفض نهائي اني اترك عيالي عند اهلي وتوصلت لحل اني اتركهم عند هدى اختي...,

وطلبت من خالتي تتوسط بالموضوع وضغطت عليه وافق انزلهم عند اختي لأن بيتها قريب..,

الصباح اطلع فيهم عند هدى والظهر ارجع اخذهم وعلى ها الحال انزل قدامهم شايله اغراض المدرسه

واغراض عيالي ولا في يوم قالت خالتي حرام تسحبين ها البزارين وراك...!

واناساكته وراضيه وش اسوي صحيح بيت اختي قريب من بيتهم لكن تعب علي كل صباح...!

اشيل عيالي صيف وشتاء غير الاحراج الي من زوج اختي كل ما جيت انزلهم عليهم...!

وحتى توصيل للمدرسه مارضى يوصلني على اني على طريق شغله...,

طلبات المدرسه احلم حلم انه يروح بي اشتريها...!

لا لازم انتظر اخر الاسبوع اذا طلعت لأهلي واخلص شغلي ...!

البنات يزورون اهلهم يستانسون واناازور اهلي اقضي اغراضي بين المكاتب والسوق ...!

اخر شي تعبت كل يوم وانا شايله عيالي لبيت اختي

استحيت من زوجهاالي مرات هو يفتح لي الباب قبل يطلع لشغله..,

قلت له با استقدم شغاله قال شوفي امي وش تقول اذا وافقت مو مشكله ..,

لكن انا مالي شغل لاتتنتظرين مني اجيبها لك والا ادفع راتبها..,

عطيت خالتي خبر اني با اجيب شغاله لعيالي...,

قالت اذا فيه شغاله خليهم عندي...!

لكن الحين خليهم عند اختك لين تجي شغالتهم ...!

وما قصراخوي الكبير الله يحفظه مشى لي با اوراقها ..

وجات شغالتي وارتحت من نقل عيالي لبيت اختي...,

ارجع من المدرسه تعبانه منهد حيلي ادوام بفان استأجرته مع مجموعة معلمات ...

اروح وارجع مع الفان اطلع معه اول وحده ويرجعني اخر وحده...

كل مارجعت من المدرسه القى عيالي زي ماتركتهم ملابسهم عليهم غرفتي واغراضي الي تركتها في محلها...

انا عيالي 3وكلهم على بعض مافي فرق بينهم هو كان رافض مسألةتنظيم الحمل...,

ولما اكلم الشغاله تقول كل شغل البيت انا الي قايمه فيه ...

شغالتي بس تعطي الرضعه عيالي وتغير لهم الله يكرمكم البامبرز..

ومع هذا بالعه وساكته...

خالتي كل صباح ياتعزم الجيران او انها معزومه واكيد شغالتي ماراح تفضى تشتغل لها..,

في يوم جلست انا وخالتي ابي اتودد لها واجس نبضها لأني ناويه اشتري بيت ..

قلت خاله اتمنى اشتري بيت اوسع من ها البيت الي ضاق علينا..

وبعدين ايجارودور ثاني بنطلع نعيش في بيت ملك لنا..

وسكتت عني ما ردت علي قلت يمكن السكوت علامة الرضا ..

و قلت الفكره لصالح..,

ورد علي انه ماله شغل وراتبه ماراح يدفع منه ولا شي...!

حاولت معه ورفض يساعدني..!

البيت لنا كلنا ابي سلفه منه وياخذ علي شيكات ما رضى ...,

هو عنده خير وراتبه يغطي وابي قرض منه بدون فوائد ولا عطاني وجه...!

حتى كفاله رفض يكفلني عند البنك...,

يقول لو بيرحون فلوسي علي من بيعوضني وانا وش يضمني انك بتواضبين بسداد البنك..

على ان البيت الي باخذه بنعيش فيه كلنا...!

كل ما فتحت معاه موضوع البيت ماعنده الا كلمة لاااا..

ما نا قشني حتى البيت با اسم مين تبينه..؟

يمكن لو نا قشني وضغط علي شوي راح اكتبه با اسمه...!

يوم شفت مافي فايده من صالح وانه ماراح يساعدني اشتري بيت ..

اخذت قروض على راتبي وساعدني ابوي واخواني واشتريت البيت وكتبته بأسمي...!

يوم جيت اخبرهم يعني بسويها مفاجئه...,

توقعت انها بتسعدهم وخصوص خالتي بيرتاحون من الايجار والبيت الي اشتريته كبير..,

وبيتهم الي ساكنين فيه صغير اناعايشه بغرفه ومعي عيالي ثلاثه وانا وهو خمسه

كلنا بغرفه وحده ابي اتوسع وعيالي ياخذون راحتهم ..

خواته فرحوا يوم قلت لهم الا امه وهو ...!

قعدت امه تصارخ تقول تبي تمنن علينا هذي من زمان تحفر انه تاخذك وتخلينا..

قالت لي انها تبي تشتري لها بيت ما صدقتها...!

ارسمت وخططت هي واهلها ونفذوا..

اليوم اخذت البيت وبكرا تاخذك انت وتخلينا...!؟

وتقعد تبكي وتقول يا خسارة تعبها وان محد عوضها ...,

كلامها قهرني يعني هذا جزاتي منها تفسر الي سويته اني با اخذ ولدها واقطعها منه ..

وانا حملت نفسي ديون سنين ما تخلص علشان اشتري بيت وابيها هي وبناتهايسكنون معاي في ها البيت ..

انفجرت فيهم قلت ما في احد استحمل الي استحملته منك انتي وولدك...,

عيالي اشيلهم وقت برد والا حر قدامك ما مسكتيهم...!

ويوم جبت شغاله مالي منها الا دفع راتبها..’

حتى عيالي اروح وارجع من شغلي القاهم على الي تركتهم عليه وشغالتي تحت يدك ولعزايمك...ّ!

ما تخافين الله يسوي في بناتك الي انتي تسوينه فيني قاعده لي على الطالعه والنازله..

ضربني كف صالح وسحبني لغرفتي وقلت خلاص تعبت منكم ابي اروح لبيت اهلي..,

قال انقلعي وكلمي اهلك الحين ياخذونك قبل يطلع من البيت قال لا ارجع والقاك في البيت...,

يوم طلع تعوذت من الشيطان وقلت بجلس وش اسوي علشان عيالي..

طلعت بعدها ابغى اعتذر لخالتي والم الموضوع

انفجرت بوجهي وقامت تدعي علي وعلى اهلي وان اخواني هم الي قووني عليهم..

وحتى خواته الي كانو معاي قلبوا علي..

يقولون تبين تقطعينا من اخوناابونا توفى ولا لنا احد غير صالح ...

رجعت لغرفتي وبكيت وصار حالي مثل الي رضى با الهم والهم مارضى فيه..,

رجع صالح في الليل قلت بكسبه رتبت غرفتي وزينتها وبدلت لبسي..,

ابي اهيئ له جو نتفاهم فيه..,

قال مسويه تعتذرين مالك عذر عندي...!

ما تحمدين ربك من زين ها الوجه صابر عليك فرحانه باالو ظيفه لا ومن زين التخصص بعد...!

انا ما ادري كيف توظفتي على ها التخصص..

دقي على اهلك ياخذونك توقعت اجي ما القاك ..

يا قو وجهك اطردك وانتي لازقه وقعد يحقرني ويستهزئ فيني..

قهرني كلامه ورديت عليه..

قلت الحين انت من زين وجهك والا اخلاقك دفنت حياتي معك وساكته وراضيه..

لا زين وجه ولا زين فعول شيختك علي وانت منت كفوا انت من انت والا من زينك ما تشوف وجهك..

قال انا رجال وحر كنت ابي مزيونه بس ابتليت فيك لكن الحين خلاص لصبر حدود...,

يالله لا اشوفك في بيتي واتركي عيالي...,

وتشوفين بكرا المزيونه الي بتختارها امي وبتعيش هنا بمكانك وبغرفتك ...,

طلعت من القهر وكلمت اخواني وجيت في بيت اهلي و ثاني يوم ارسل الشغاله وملابسي...,

لأن الشغاله مطلعتها على كفالة اخوي وهو خاف من مسؤليتها...,

ما طلق الابعد ماعطيته تعويض لكن عيالي حرمني شوفتهم...,

و له فتره طويله قاطعني منهم ماهو راضي لا اروح اشوفهم ولاهم يجوني..,

اشتكيت عليه والقضيه با المحكمه ابي اشوف عيالي...,

ام عوق\ جزاتس الله خير والله يبرد قلبتس برجعت وريعاتس...,

فايزه بتردد\ياخاله بقول لكم شي علشان ابري ذمتي...,

ام عوق بقهر \قولي نسمتعتس الله يكشف ضرتس..

فايزه بوجع \ترى صالح صدق بخيل ويصدق الي يسمعه بسرعه وعصبي وما يضبط اعصابه..,

لكنه رجال راعي صلاه ما يفوته فرض وبار في امه وعفيف ما عنده سوالف بطاليه..,

ولا هو راعي استراحات ولا دخان وحتى المصروف الي كان يعطيني قبل اتوظف ..

رغم انه قليل الا انه ما قطعه عني بسبب الوظيفه..,

وراتبي مااتذكر انه طلب ريال واحد منه ...,

البخل والعصبيه طبع في الانسان وانتم مخيرات ...!

انا ماقدرت اتفاهم معاه ولا مع اهله..

ومع عوق يمكن يتغير الوضع وتعيش الحياه الي ما قدرت اعيشها معه...,

اخو صالح الي اصغر منةرجال ملتزم لكن فرق ماهو مثله...,

عمره ما قصر في حق بيته...

زوجته عايشه احلى عيشه وحاط لكل شي حد بما يرضى الله سواء زوجته والا اهله ما يرضى الغلط ..

وكثير صار بينه وبين صالح وامه مشاكل على شاني ماكان راضي بلي يصير لي...!

والله يجزاك خير يا خاله على ها الدعوه الطيبه ...,

ام عوق با امتنان\انتي والله الي عسى ربي يجزاتس خيريمكن كلامتس فتح عيونن مغمضه..!!

فايزه \يا خاله ترى الاخلاق مالها علاقه بمطوع والا غيره زين الاخلاق وشينها هذا شي من الله سبحانه..,

ام فواز\يا ام عوق اذاصار بينكم توافق انتم وصالح خلكم واضحين من البدايه ولا تجاملين احد على حساب بنتك

وبعدين صالح الله يكفيني شر غيبته فاهم بر الوالدين غلط..

وامه الله يهديها ما تقبلت ان ولدها اذا تزوج خلاص له حياته الخاصه ..

وما نقول الا عسى الله يوفق الجميع وهو ابن حلال بنتنا عنده كم سنه ما شفنا منه لاخير ولا شر..,

الا بعد ما طلق غثنا انه مسك العيال عن امهم وطلب فلوس علشان يعطيها ورقتها..,

بنتنا يمكن لو ام صالح شوي كانت سموحه كان يمكن للحين في ذمته بين عيالها..

ولا تحسبين بيضيع عند الله شي الي له حق بياخذه فايزه والا غيرها...,
.
.
.

حاولوا يمسكونا على العشا لكن رفضناواعتذرنا منهم قلنابنعوضها وقت ثاني..

استأذنا من عندهم وطلعنا..,

سبحان الله ما ادري ليش اول ما طلعت من بيت اهل فايزه وقبل اركب سيارتنا جا في بالي هالدعاء

(اللهم اجبرني في مصيبتي واخلف لي خيرآمنها) وقلته بيني وبين نفسي...!!

رجعت لبيتنا وانا افكر بفايزه...,

البنت حلوه وفي وجها شي يجذبك بدون ما تحس وكلامها كله عين العقل ولا شفتها ظلمت صالح قالت شينه وزينه..,

حتى كلامها كان كله تفسير للي قاله صالح كل واحد منهم قال الي عنده ما كذب لكن من وجهة نظره..,

.

.

.

بعد اسبوع من مشورارنا لفايزه

جا اليوم الي قطع صالح خيط العنكبوت الي بيني وبينه..!!

دق التيلفون ورديت صوت حرمه غريب اول مره اسمعه طلبت امي وكلمتها ...؟

دريت من كلام امي معهاانه يتعلق الموضوع فيني انا و صالح..!

الحرمه\......

ام عوق\جزاكم الله خير وصادقه اي بالله اخره نور

الحرمه\.......

ام عوق\ البنت استخارت وتقول ماتبي العرس تبي تدرس...,

الحرمه\........

ام عوق \ما اقدر اضغط عليهااذا تخرجت..,

الحرمه\.......

ام عوق \ تبي توظف ولا تبي شي يلهيهاعن وظيفتها ..

الحرمه\........

ام عوق\لا بالله البنات واجد ودورو غيرنا الله يرزقكم وانتي ماشاء الله ولدتس كلن يتمناه ..

الحرمه\.......

ام عوق\يا ليتس تشورين عليه يرجع لأم عياله وما ضنتي بيعصاتس تراكم ضيعتم من يدكم ذهبه...,

سكرت السماعه امي وهي شكلها معصبه..!!

عوق بحذر\ يمه من الي كلمتس..؟

ام عوق بتهكم\ يعني ما تدرين من..!

عوق با استنكار \الحرمه اول مره اسمع صوتها با التلفون..,

ام عوق با استهزاء\ وان شاء الله آخر مره هذي ام صالح داقه وهي متوكده انا موافقات على ولدها...,

تقول عندهم شريط صغيييير والي اوله شرط اخره نور على قولة ام صالح...,

عوق بخوف\وش هو شرطها...!؟

ام عوق با استهزاء\مايبون منتس ضنا....!!

اردفت ام عوق بوجع\يبون يقطعون ضناتس ام صالح تقول عيال صالح مكفينا وعيال رجلها مثل عيالها...؟!

قمت من عند امي ما اشوف الطريق من الدموع...,

وابكي بدون شعور الحقتني امي وحط يدها على راسي ..,

ام عوق بألم\ ابكي ياعوق اغسلي قلبتس بدموعتس يا بنتي..

ولا تسعجلين رزقتس ربي ما شق فم الاهو متكفل برزقه...

ابكي وارجعي لي عوق الاوله ...,
.

.

.

وطلعت امي من غرفتي وسكرت الباب وراها..

يعني ياصالح شين وقوي عين وانا وش ابغى من زواجي منك الا ذريه تشيليني وتونسني بها الحياه ..,

اذا على الوحده اعيش مع امي اخدمها واونسها ...

يعني تبي تحرمني خايف من الناس بكرا يقولون هذولا عيال صالح الي امهم بنت حموله..

وهذولا عياله الي امهم لقيطه ما يدرى منين جات..,

ومن الي يطالب با لشرط امه وبكل تبجح بعد..,

اثاري امي صادقه امس يوم تقول ما طريقتس وطريق صالح واحد ...!

انا عرفت طريقي الي بمشي فيه يايمه ...!!

خلاص ماعاد فيه زواج ولا ابي عيال يسألونهم الناس من هم خوالكم.. !!

نظرت الناس للقيط كلها وحده اعاقه في جسد المجتمع..!

.
.
.

من بعد فشل خطبة صالح والبكى الي بكيته من قهر وحسره وألم ..

طلعت لأامي عوق جديده...,

وشديت حيلي بدراستي حاولت اتفوق على قد ما اقدر...,

نظامي رجع زي ماكان اجلس انا وامي ...,

اذاكر واراجع حفظي للقرأن..,

واسمع لأامي الي هي حافظته..,

ما تصدقون انها هدت نفسي ولا عاد يشغلني موضوع الزواج مثل قبل..,

باعيش يومي لحظة بلحظة ارضي ربي وابر امي وبكرا مخليته على الله...

لكن مع هذا دايم اتحرى اوقات الاجابه وبتهجدي واطلب ربي صلاح حالي سواء بزواج او غيره ويحفظ لي امي...,
.
.
.
وفي يوم رجعت من الكليه بعد العصر عندي محاضرات متأخره وشفت شاص سعد اعرفه بسم الله وش جايبه..!

ما طردته امي وافتكينا فتحت الباب با المفتاح ودخلت...,

طلعوا بوجهي سعد وسالم وناصر ولد سعد ..,

سالم يناظرني وهو مكسوره عينه وانا اقول بقلبي سبحان الحليم الستار..!

انت من الفئه المفروض اذا شافها الواحد قال((قل اعوذبرب الفلق ,من شر ما خلق))

تعايروني اني لقيطه وانت ياسالم بنفسك وش بغيت تسوي من مصيبه..!

لكن ربي سبحانه حفظني ..!!

سلم علي سعد..

سعد بتساءل\انتي عوق...!

عوق\ايه يا ابوناصر اناعوق بنت الوضحى..!

سعد با اهتمام \وشلونتس عساتس طيبه وشلون امورتس بشريني عنتس..,

عوق بملل\ابشرك من الله بخير..

ماعطيته فرصه يكمل سوالفه قلت سلم على البنات ودخلت للبيت ولا التفت وراي ...,

طلعو اسمع صوت الباب تسكر...,

دخلت غرفتي اغير لبسي..

تذكرت ذاك اليوم الرهيب وانا با المتوسط في بيتنا الشعبي القديم ..


.
.
.


(كلمه اخيره)



من اقوال الشيخ عائض القرني؛

1-ما مضى فات، وما ذهب مات، فلا تفكر فيما مضى، فقد ذهب وانقضى ..

2-لا تكثرمن القول القبيح والكلام السيء الذي يقال فيك فإنه يؤذي قائله ولا يؤذيك ..

3-سب أعدائك لك وشتم حسادك يساوي قيمتك لأنك أصبحت شيئا مذكوراوشخصا مهما ..

4-كرر( لاحول ولاقوة إلا بالله ) فإنها تشرح البال، وتصلح الحال، وتحمل بها الأثقال، وترضي ذاالجلال ..

5-اترك المستقبل حتى يأتي، ولا تهتم بالغد لأنك إذا أصلحت يومك صلح غدك ..


.
.
.
الي الملتقى قريبآبأذن الله

  رد مع اقتباس
قديم 2015-01-18, 03:27 AM   #10
دلـ،ـع حَسبتّك . ♡
الصورة الرمزية وينــــــــــــك حبيبـــي
 
وينــــــــــــك حبيبـــي has a spectacular aura about وينــــــــــــك حبيبـــي has a spectacular aura about وينــــــــــــك حبيبـــي has a spectacular aura about وينــــــــــــك حبيبـــي غير متواجد حالياً

 


البارت التاسع
.
.
.

تذكرت ذاك اليوم الرهيب وانا با المتوسط في بيتنا الشعبي القديم ..

امي لما تركت البر اقترح عليها سعد يشتري لها بيت قريب من بيته هو واخوانه

علشان بيوتهم قريبه من بعض ويقدرون يخدمونها ويقضون مشاوريها

رفضت تقول انا اخذت على الوحده والبعد عن الناس من اول حياتي

وطبعي ولا ني مغيرته يوم جيت المدينه...,

واشترى لنا سعد بيوت وطلب من امي تشوفها والي يعجبها تسكنه ...,

امي اختارت الحاره الي سكنا فيها تقول من دخلت الحاره قلبي انشرح لها

وبعيده عن كل جماعتنا وعيال ناصر...,

بيتنا شعبي ومبني داخل حوش كبير وفيه مزروع نخل وشجرتين سدر كبيره..

في بزاوية الحوش غرفة صغيره مبنيه اذا جا الشتاء امي تمليها سمروفحم

وجنبها حمام تكرمون ومغسله ..,

في الجهه الثانيه سعد مزين غرفه وحمام لشغالات وازواجهم الي نستقدمهم...,

طلبته امي يستقدم لها سواق وزوجته ويشتري لها سياره...,

تقول انتم عندكم حياتكم وعوايلكم وش بتلحقون عليه وانا ربي مقدرني والخير واجد

ليش احملكم همي بتقضون شغلي يوم وتنسوني عشره..,

وهذاانامن عرفت الدنياوالسواق والشغاله ما يفارقونا.

سكنهم مستقل يعني الشغاله لما تروح لزوجها لازم تطلع من برى وكان هذا طلب امي..,

غرفهم داخل الحوش لكن ابوابها تفتح على برا...

حتى شبابيك غرفة الخادمه وزوجهارفضت امي يكونون من جهة حوشنالأنا كثير نجلس با الحوش وامي ماتبيه يكشف عليناشي

قالت لسعد يشوف لهن صرفه وسعد غيراماكن الشبابيك على طلبها...

استبدلتهم امي في بيتنا الجديد ملحق كامل لسواق وزوجته ونفس النظام السواق ابدآماله دخول على بيتنا

الملحق منفصل تمامآ عن بيتنا...

امي كل عصرتفرش لها الشغاله فراش بظل النخل ..

تجلس فيه وانا اذاكر والا العب عندها با المرجيحه الي ربطتها لي خالتي نوره بين السدرتين ..,

كنت نايمه بعدصلاةالعصر وصحيت قبل المغرب بشوي ..,

انام مع امي بنفس الغرفه على فراش واحد ...,

ما صرت انام با الحالي الا بعد ما نقلنا لبيتنا الجديد..,

وحتى اخذت فتره اخاف لكن امي تشجعني وتقول اني صرت كبيره لازم انام با الحالي..,

طلعت ادور امي مالقيتها...؟ّ!

ناظرت با المطبخ الشغاله معطيتني ظهرها تكنس ..,

غريبه امي وينها ماهي عوايدها تطلع وتخليني با الحالي..!

امي معطيه اوامر لسواق سيارتنا تكون قريبه جدآمن بابنا الي يفتح على الشارع..

الي يمر من قدام بيتنا السياره تكون بينا وبينه ما يشوف بابنا ولا يشوف الي يدخل علينا..!

ناظرت من تحت الباب سيارتناموجوده..!

اكيد امي قريبه بس مستغربه وين راحت..!؟

اخذت كتبي وطلعت لحوش النخل اذاكر كنت في اول متوسط وأول اسبوع بالسنة الدراسيه ...,

جدار الحوش مخليته كأنه سبوره كبيره...,

وكا العاده انسخ الماده الي اذاكرها واسمع لنفسي...,

سمعت احد يطق الباب ما اهتميت امي معاها مفتاح...!

واذا من حريم الجيران الخدامه بتفتح لهم الباب وتقلطهم لين تجي امي...,

مندمجه اكتب ما شفت الا يدين كبيره جات من وراي وحضنتني و مسكت يديني بقوه...!!

يوم رفعت راسي واناظرالاهو سالم يضحك طار قلبي من الخوف اسنانه صفر لاعب فيهم الدخان..؟

وعيونه فيهن شي غريب حسيتهن يخوفن ..؟!!

وانا من زمان اكره سالم عيونه ماتريح واكره نظراته لي ...!

كل ما طلعنا معاهم للبر وكان هو موجود ما ارتاح من مغامز عيونه لي ..,

يترصد لي من يوم يشوفني ابعد عن امي لو ثواني الا هوطالع لي بسم الله ..,

اكره وجهه وصوته يوم يتلفت بسرعه..!!

ويقول بصوت واطي مغزز عوق ورى ما تقولين لعمتي تخليتس با الاجازه عندنا...,

انا اجي اخذكم بنفسي وارجعكم وتستانسين مع البنات

ومرات يقول عوق تعالي اركبي معي بسيارتي بعلمك كيف تسوقين سياره ..

على كثر حرص امي علي و حرصي اني ما ابتعد عنهانهائي اذااجتمعنا معاهم ..,

انام معاها واصحى معاهاالا انه يلقى فرصه لو ثواني ويسمعني كلامه السم

حاولت استنجد بأحد يفكني منه ماقدرت ...

حاط يده على فمي وكاتم صوتي حذفت كتابي والطبشوره الي بيدي...,

ابي اعض يده علشان يفكني واقدر اهرب ما قدرت ...,

كان مثبت ايديني وجسمي بيد واليد الثانيه على فمي ويسحبني يبي يدخلني لغرفة الحطب ..,

وصوته وكلامه المثير للأشمئزاز بأذني..,

حاولت وحاولت ودست على رجوله وخبطتهن بكل قوتي...,

وماقدرت اتفلت منه الا لما وصلني للغرفه وهو يسحبني غصب عني

دف الباب بكتفه بيفتحه وارتخى جسمه وقدرت افلت منه ...,

وبسرعةاخذت تراب وحصى من الارض وارميه على عيونه واركض داخل البيت ...,

سمعت صرخته وانا اركض وصوته وهويسبني ويشتمني..

وادخل غرفةامي واسكر الباب واحس رجولي ماعاد تشيلني من الخوف وقلبي يدق بسرعه ..,

واجلس ورى الباب اتخيله يلحقني ويمسكني وامي ماهي فيه...!

ماادري كم مر من الوقت وسمعت صوت امي ..!

طلعت حضنتهاواناابكي وانتفض وهي تضمني و تسمي علي وتلمس ثيابي...,

ونادت الشغاله وقالت لها تجيب لي ملابس لأني من الرعب الي شفته بللت ملابسي واستفرغت عليها...

امي تسألني وتسمي علي وش الي خوفني وروعني وقت المغربيه ووصلني الي هالحاله..,

وشربتني كركم مخلوط بمويه عن الروعه ..

خفت اقولها تكذبني وتحط اللوم علي...

سالم رجال كبير وابو عيال ماراح تصدقني ...,

اواذاقلت لهاالحقيقه بتكبر السالفه...,

وهذا ما يخاف الله يمكن يقلبها علي يقول عوق قليلة ادب ومسويه شي مو زين وامي تذبحني..

هو ما دخل داخل البيت وتهجم علي ...

لقاني با الحوش على وقت المغرب...

وامي دايم تحذرني ما اجلس با الحوش با الحالي خصوص مع المغرب...,

ولااقرب اي مكان فيه رياجيل حتى ولو انهم عيال خالي...,

قلت لها حلمت حلم روعني وصحيت ما لقيتس وخفت..

سألت الشغاله وش مخوفني ..!

احد دخل با البيت وهي ماهي فيه ..؟

قالت لا ما في احدو عوق كانت نايمه با الغرفه..

الحمدلله ان الشغاله ما شافتني يوم طلعت للحوش والا كان صارت مصيبه

الشغاله خبرتها ان سالم دق الباب وفتحت له لكن ما دخل للبيت راح لحوش النخل ..,

وامي مستغربه منه وين اختفى..!

حسيت بعيون امي شك يوم قالت لي انتي قاعده يوم دق الباب ..

قلت ما ادري عنه ماسمعت شي توني صحيت..

سألتها انتي وين رحتي وخليتيني با الحالي..,

قالت سالم ناداني علشان بياخذ شوري با اشياء بيضيفونها لبيتناالجديد...؟!

الي كنا تونا بادين نبني فيه وكان البناء على طلب امي...,

لأن الشعبي ماهو آمن واذا جامطر نتضررمنه والحاره طيبه ماتبي تبدلها

وطلبت من سعد يبني لنا فله با ارضنا الملاصقه لبيتنا الشعبي ...,

يعني الي يطلع من العماره على طول يدخل لشعبي

النذل تركها هناك واستغل ان امي منشغله مع العمال وطلع من وراها..

امي ظنت انه جا يبغى يشرب مويه والا بيتوضا لصلاة المغرب .

و دخل للحوش وطلع وانا نايمه ...

اخذت فتره وانا احلم ان سالم يركض وراي ويبي يعتدي علي واقوم مفزوعه...,

واحضن امي واحب عيونها ولا انام الا وانا اشم شعرها...,

وامي دايم تلح علي تسألني سامعه شي با المدرسة وحده من زميلاتك متعرضه لشي ومعلمتك فيه..!؟

وانا انكر ولا اعترفت لها بشي حتى نست الموضوع ...

ومن يومها اخذت الحذر منه ومن غيره بدال المره الف مره..!

عرفت وش معنى خوف امي علي وتحذيري خافت ان يطلع لي كم ظالم بجلد مسالم...,

وكل ما تذكرت ان ربي فكني منه ودي اسجد سجود شكر..,

.
.
.

صحيت من افكاري وانا دموعي ماليه وجهي..,

كم با الدنيا من سالم مالطفوله وبراءتها عندهم حرمه والا احترام..,

يدخلون بيوت على حين غره من اهلها ويهتكون براءة اطفال..!!

ما يرحمون صرخاتهم والا صغر اجسادهم

مسحت دموعي بيديني وطلعت ادور امي ...,

حسيت اني مشتاقه لهاوابي ابوس عيونها..

احس براحه وآمان اذا حبيتها مع عيونها والا شميت شعرها ..

واسمع صوتها تنادي علي جالسه با المشب..,

دخلت عندها وحبيت راسهاوعيونها..,

رفعت راسها لي وهي مرتكيه ..,

ام عوق بمحبه\يا عيون امي وراتس تأخرتي...

عوق بتأثر\جعلني افدى عيونتس عندي محاضرات متأخره وانا قلت لتس الصبح قبل امشي...

ام عوق بمزح \وش عندتس على حبة عيوني مبطي ما حبيتني على عيوني ولا شمشمتي قريناتي اكيد انتس حلمانه..!

عوق \لا فديتس بس تذكرت انتس اكبر نعمه عطانيها ربي..,

ام عوق با ابتسامه \واشوف رموشتس مفتلها الدمع كل هذاخايفه على اميمتس العجيز..,

عوق تضحك وتبلع غصه بألم\ لا والله يا امه بس مرات اذا ربي انعم عليك بنعمه..,

ما تحس الا عيونك تصب دموع شكر على ها النعمه..!!

اردفت عوق بتساءل \وش عندهم قرايبنا المصونين جايين ومير سعد طالع وهو متشقق من الفرح..,

ام عوق \ جايين يتعذرون ويقولون ياعمه تكفين سا محينا والله انا غلطنا ومالنا غناتن عنتس

واطلبي الي يرضيتس ونسويه..,

عوق با استنكار\وعسى سامحتيهم...!

ام عوق با استعطاف\يا بنتي من واخذ خويه با الزلات خلاه الزمن بلا خوي اي والله سامحتهم ...,

عوق بقهر \يمه الي سووه ترى مهو شوي والله لو بيديهم كان طردونا من حلالنا بالشارع..,

ام عوق بثقه\ما علينا منهم وانا امتس وش مخوفتس ...,

كل شي با اسمتس والحين انتي كبيره وفاهمه ومتعلمه محد يقدر يدوس لتس على طرف...,

عوق بتحذير\يمه ترى مالهم آمان وبدال المره بيكررونها مرات..

ام عوق \ماهم مكررينها ان شاء الله ماهم مهابيل..!

درو انا كشفناهم وعارفينن من انا..

لو ابي التفتلهم والله لخليهم يمشون حفيانين وانا امتس بس اني متغاضيه علشان عشرتي مع ابوهم ...,

ولا ابي الفضايح على تالي عمري علشان وصخ دنيا...,

ام عوق با استعطاف\وترى سعد حبيب وكم له موقف ما ينسى لكن ابليس شاطر..,

والله يا بنتي اني ما انسى سعدوفزعاته...,

كم ليلة وانتي رضيعه اذا مرني ولقاتس مرضانه يركض بتس قدامي من مستشفى لمستشفى

شايلتس على متنه يدور الطبيب الزين لتس ..,

وتخبرين سواويقنا وخداماتنا انه يسافر بنفسه و يتخيرهم تخير ويجيبهم ويدربهم على يده..,

اردفت ام عوق بألم\ يا بنتي فتنة المال عظيمه وماهو كل نفس تقدر تصمد قدامها..,

ويكفيهم الي جاهم مني من زعل وملامه خلينا نصفي النفوس ومحد يدري وش يصير باتسر..

وش بقى با العمر يا بنتي نقضيه عداوات...!

الحين عيال ناصر يبونا بس نسكت عنهم وما نعلم بسوايهم بحلالنا قبل ...!

يكفيهم الي بقلوبهم ..,

عوق بقهر \ما اقول الا بس الله يكفينا شرهم وخصوص الحيه الرقطاء سويلم

والا سعد ماله كلمه يمشي وراه يدربي راسه ما يدري وين الله حاطه..!

ام عوق بضحك\ سعد جاي يعزم على عرس ولده ناصر على بنت سالم

ويقول والله مايصير عرس لين تحضرين انتي وبنتس عوق.

عوق ترفع حاجبهابتهكم\الحين بنتس عوق يا سبحان الله ...!!

عرسهم مانيب حاضرته تبين حريمهم ينغزنا با الحكي ويغثنا ...!

ما سلمنا وحنا في بيتنا بنسلم وحنا بينهن..!

ام عوق \لا والله ان شاء الله بنحضر ونتونس انا وانتي وعين عمار با النار الي له شي عندنا يجي يطلبه وانا امتس..,

ام عوق با استعطاف\ناصرولد سعد يا قليبي بكى وسلم على راسي وايديني يقول ياجده مالنا قيمه بدونتس..,

عوق بألم \يا كبر قلبتس يا يمه الي ما يشيل على احد..,

آردفت عوق بقهر\هم يبونتس باالعرس واجهه اجتماعيه بنت نمر بن هجاد مشرفه عرس عيال رجلها والا هم ما فكرو فينا..!

جماعتنا مسويه لهم قدر من قدرتس والله لوان الجماعه تسمع منتس كلمه شينه عليهم..؟

ما صب لهم فنجال بمجلس لكن مديحتس لهم عندالجماعةهو الي رافع خشومهم..!

ام عوق \الحمدلله يابنتي الله لايجعل لناحاجتن عند الناس ...,

.
.
.

فكرت بكلام امي هي صادقه كل شي مكتوب بأسمي ورسمي بيع وشراء..

والدوله تتعاطف كثير مع الي في مثل وضعي..,

وسعد وسالم لو يركضون بيدينهم وارجولهم ما يقدرون يسوون شي..

وانا الحين راشده والله لو يوزهم الشيطان ويلعبون من وراي...,

اني لأانومهم با السجن لكن دامهم هاجدين..,

ليش احرم امي تستانس معهم ما يكفي اني قطعتها من لحمها ودمها الصدق ...

خلها تحضر عرسهم وتكسر عيونهم وعلى قولة امي عين عمار با النار..,

.
.
.

مرت الايام وحضرنا زواج ناصر ولد سعد على بنت عمه سالم..

وضحى وحريم سعد وسالم غصب بالعيني عكس بناتهم

انبسطت مع بنات سعد وسالم وبنات وضحى ولا كأني اشوف امهاتهن ..

البنات حبوبات راعيات فله ووناااسه ..,

ومع هذا ما حاولت اعطيهن مجال يكلمني على التيلفون

يوم طلبوا مني قلت امي ما تحبني اكلم احد الي يبيني يزورني في بيتي..!

حبيت علاقتنا تكون في بعض رسميه لأني اول شي ما اضمن اهلهن وبعدين قرب عيال ناصر مهماكان قرب نمله..!

سعد بناته ثلاث وضحى وغزيل وانتصار غزيل مسميها على امه...,

وسالم بناته ثنتين وضحى وافراح ..,

وبنات وضحى ثنتين ابتهال وامجاد...

العروس كانت وضحى بنت سالم وزوجها ناصرولد سعد

وضحى بنت ناصر و حريم سعد وسالم يضحكون ويمزوحون مع امي ..

يقولون ياعمه التاريخ يعيد نفسه ناصر تزوج وضحى ..,

سوالفهن يا ثقلها على قلبي وخصوص انه باين كل الي يسونه غصب عنهن من كثر ما يبالغن...,

حتى المعازيم سمعت منهم طراطيش حكي الاغلبيه كاسره خاطرهم وبالشين فيني وبمصيري..

الي تقول ان عيال ناصر بياكلوني بدون ملح لو صار للعجوز شي..؟!

والي حاسده عيال ناصر على حظهم الكبير ان امي كانت زوجة ابوهم..,

والا ها الخير الي هم فيه ماكانوا يحلمون به ..!!

وفي منهن الي متأكده وسامعه من ناس ثقات ان امي تنتظرني اتخرج وتزوجني سالم والا سعد

يا حليلكم يا عيال ناصر معازيمكم عارفين بنصبكم وانتم تحسبون محد يدري عن سوايكم..!!

ومع هذارجعت مبسوطه من العرس حتى امي ارتاحت يوم شافتني مستانسه.

كله علشانتس يا الوضيحي يهون...,
.

.

.
مرت الايام سريعه وتخرجت من الجامعه بتقدير جيد جدآوهذا تقديري من عرفت نفسي...!!

ام ابراهيم خبرتنا ان صالح سمح لفايزه تاخذ عيالهاقبل تحكم لها المحكمه ...,

وتزوج بعد ما طق الف باب وباب وحده مطلقه ومعاها طفلين...!

وعايش في بيت مستقل جنب بيت امه مع زوجته الجديده

زوجه صالح الجديده موظفه واشترطت عليه ان اولادها يكونون معاها... ,

والطريف با الموضوع ان ام ابراهيم شافتها...,

فرق بينها وبين فايزه...

فايزه احلى منها بكثير ..,

والاطرف ان زوجة صالح اذا طلعت لدوامها تترك اولادها عند ام صالح ...!

يقولون زوجته الجديده حالفه ما تدخل شغاله في بيتها ما تثق في الشغالات وانهم راعيات سحر ودجل...,

سبحان الله الحياه فعلن مجموعة متناقضات ...؟!!

ام صالح ما رضت تمسك عيال ولدها انجبرت تمسك عيال الناس...!

وصالح كان يبحث عن الجمال طلق زوجته الي على طول كان يعلق على شكلها

واخذ وحده اقل منها جمال...!

يا ترى يا صالح زوجتك الجديده تشوفها بعيونك والا بعيون امك...؟

اي صح نسيت اخبركم ان زوجة صالح الجديده تخصصها نفس تخصص فايزه..!
.

.

.
كثير كانت تمر علي ساعات ندم..,

وانقهر من نفسي انا وين كان عقلي يوم كنت افكر با الزواج...!

كيف ما فكرت بأمي وضعها وكبر سنها...!

وان الي بتزوجه ماراح يسمح لي اجلس عند امي ..,

الحمدلله ان ربي ماكتب لي مع صالح نصيب واكيد كنت بتحسف لكن وش عقبه..!

عقب مايطيح الفاس با الراس ولا عاد فيه تراجع..,

لو كان وحده غير امي يمكن ضعفت ووافقت تزوجني يوم شافتني مندفعه للعرس..,

لكن امي نظرتها بعيده حتى برفضها لصالح ..,

قالت انها حاولت فيني اتزوجه لكن انا الي رفضت واعتذرت با الاستخاره والدراسه..,

يا قلبي يا الوضيح نسيتس مع افكار المراهقه والهبال الي سيطرت علي

لكن ان شاء الله بعوضتس لا زواج ولا بعد عنتس بعداليوم..,

قدمت على وظيفه وجا تعييني بهجره بعيده و رفضت...,

والا امي قالت عادي اروح معتس كان لتس نفس با الوظيفه

رفضتها علشان امي ليش احرمها من جيرانا وبيتنا الي هي مستانسه فيه..,

من غيرحارتنا الي امي تحب ناسها وناسها يحبون امي ويقدرونها..,

ماهو لازم ها الو ظيفه اذا هي بعيده...,

قدمت على مدرسه اهليه قريبه من بيتنا وقبلوني...,

درست فيها سنه لكن استغلال للمعلمه شي موطبيعي..,

احيان يوصل نصابي با اليوم خمس حصص متواصله با الاضافه للأنشطه..,

تركت المدرسه الاهليه اخذت خبره سنه حاولو يمددون معي العقد لكن رفضت ..,

خليت المجال لبنات احوج مني للوظيفه ...,

وقدمت على الماجستير اشغل وقتي ..,

الفراغ يذبح وهذااناطول عمري جهاد مع الدراسه كلها تعب في تعب..,

خلصت السنه التحضيريه ..,

الدراسه بتنفعني وبتشغل تفكيري عن اشياء كثيره وانا ما ابي ارجع لأافكار الماضي وخرابيطه..,

احس امي كبرت وتتعب من المشاوير البعيده...

وانا الحين دخلت 25سنه اتمنى اني احج ولااعتمر ..,

شوفة مكه با التلفزيون تقطع قلبي لكن ما في محرم لي..

عيال ناصر قليل صاروا يمرون علينا من بعد عرسهم..

لكن يتطمنون على امي با التيلفون انشغلوا كثير عنا..

سعد هو الي كان ما يقطعنا ابدآ لكنه طلب تقاعد مبكر

وصارت حياته اكثرها با البر وسالم ما يجي الا مع سعداذا جانا بعد حركته القديمه معاي ...,

اقارب امي اقصد اهلي يا كبر ها الكلمه اعجز حتى انطقها بيني وبين نفسي

انقطعوا ماعاديسألون عنا شكلهم لقوا لبدر متبرع غيري..

واحيانآحريم الجيران يمرون علشان يشوفون امي ويتطمنون عليها..,

مافي الا عايلة ابو ابراهيم هم الي يوصلونا با استمرار...,

ام ابراهيم وبناتها حلقة الوصل بينا وبين العالم الخارجي..

الحمدلله ما احنا في حاجة احد من خلقه..,

لكن انك تتلفت ولا في احد يسأل عنك ويحس فيك من لحمك ودمك صعبه

عايشين بوحده والوحده موت بطيئ...,

في يوم كلمتنا خالتي ام ابراهيم الضحى على التيلفون وسلمت وسألتني..؟

ام ابراهيم\عوق ابيتس في بمويضيع عسى امتس ماهيب نايمه ...؟!

عوق بممازحه\ لا امي فديتها شيخة البنات جالسه تتقهوى تعالي خالتي لاتفوتس قهوه تقعد الراس..

جات خالتي ام ابراهيم على طول يا حبي لها شكلها تكلم وعباتها على راسها..

دخلت وسلمت وجلست وانا اقهويها هي وامي ...,

وحسيت من وجها ان عندها سالفه كبيره بتقولهاومثل ما توقعت....,

التفتت علي وقالت...!!!!!!

ام ابراهيم بتساءل \ عوق تشكين بيوم ان معزتس عندي مثل بناتي..

عوق بألم \لا والله ياخاله اصلن مالنا بعد الله غيركم اقارب وانتي عندي مثل امي ..,

ام عوق بضحك\كله منتس عجزنا فيتس والا كان الحين نوره امتس ..,

ام ابراهيم بضحك\يويلي عنتس يا وضحى مانسيتي ذيك السالفه..,

عوق بفضول\ليه وش السالفه..,

ام ابراهيم بمزح\تعلمتس وضحى هي ادرى ما اقول الا عسى اميمتي في جنات النعيم..,

ام عوق بحسره\آمين ام عبد الرزاق قليل با الحريم مثلها..!

عوق بترجي\يمه علميني تكفين حاسه اني مسويه بلوى وانا صغيره..,

ام عوق\لا والله بسم لله عليتس من البلاوي السالفه بسيطه واعلمتس بها بعدين...؟

التفتت ام عوق لأم ابراهيم\عوق تقول انتس تبينها بسالفه..!

عسى مسلط لقى لها وظيفه حولنا تونسهاوصيته مبطيي ولا رد لي خبر..,

عوق بمزح\لا تكفون ما ابي وظايف بقلايع وادرين اذا ماهي رسميه وجنب البيت ما ابيها...

ام ابراهيم \لا والله ما اطري شي يا وضحى مير الي عندي لعوق اطيب من الو ظيفه..!؟

اردفت ام ابراهيم بتعجب\ عسى بس ما نسيتي يا وضحى هرجتنا الي انتي خابره..,

ام عوق \ لابالله ما نسيت بس كنت استنظر مسلط وش عنده من اخبار ..!!

ام ابراهيم بضحك\ وانا وش جايبني لتس من صبح الله غير الاخبار الطيبه

البارحه علمني مسلط ما صدقت الصبح يصبح وجيتكن شماليلي طايره..!

وابشرتس يا وضحى انها اخبار الخيروعلى ما تبين وتشتهي نفستس..!

وناظرتني امي وهي تضحك\وان شاء الله ان يتممها الله ويسرها لعوق ومثل ما قالت نوره اطيب من الوظيفه...,

عوق بتوجس\ما اتوقع في شي اطيب من وظيفه رسميه ودخلها ثابت وقريبه من بيتنا..,

ام ابراهيم \ الظاهر ان وضحى ما عطتس العلم الي بيناوبينها..,

عوق بممازحه\والله ما ادري عنكن يا العجايز كلامكن اليوم الغاز وانا مثل الاطرش با الزفه..!

ام ابراهيم\اسمعيني يا عوق انا من زمان ناساُ واجد كلموني عنتس يبونتس وخصوص عقب عرس ريم...

كم وحده جاتني بس انا ادري انهم ما يصلحون لتس..

وامتس عندها خبر كل ما كلمني احد حطيت الخبر باأذنها ابري ذمتي قدام الله يمكن لها راي ثاني..,

اليوم انا جايبه لتس رجال كفو ...!

عوق بذعر\لا ياخاله توبه , توبه, توبه با الثلاث ...

ام ابراهيم با اصرار\اتركيني من خرابيطتس وش توبته...,

هذي ريم كبرتس عويلها يركضون وراها..,

انتي شوفي وش عندي ولاتصيرين طفقه وتستعجلين واستخيري وشاوري امتس..,

اما عن الرجال لا تشيلين هم ما خليت ولا بقيت...,

لا انا ولا ابو ابراهيم سألنا وبحثنا مانبي نشيل ذنبتس..,

عوق بزعل\ انا ما اترك امي وكانه كفو ليه ما زوجتيه من بناتس..!!

ام ابراهيم بضحك\مقبوله منتس يا عوق..

انتي داريه ان بناتي ماسكينهم اهل مسلط حتى على عيال اخواني..!

ريم وياا لله بحب الخشوم عطيناها جزاع..

والرجال هذا الي جا ما يصلح لنا والا كان عطيته من بناتي..,

عوق بدهشة\ اجل انا وش ابي فيه اذا ما يصلح لبناتس..!

ام عوق بحده\ ما تخلين يا عويق عجلتس مامن صبر الله لايبلى خلي المره تكمل هرجتها..,

ام ابراهيم \ عوق صادقه يا وضحى ماتدري وش عندي والا ما قالت ها الكلام...؟

ام ابراهيم بألم\ قصتس يا بنتي ماجهلتني من يوم سكنتوا جنب بيتي ادري انتس ما انتي بنت وضحى

اول ما جت وضحى من البر وسكنت جنب بيتنا انتي معها عمرتس شهور وكبرتي قدام عيونا ومع بناتنا

والله ما انشوفتس انا ومسلط الا مثل بنياتنا والي نتمناه لهن نتمناه لتس..,

وانتي ضحيه مالتس ذنب حلالآ بين حرامين,,’

وضعتس صعب عسى الله لايبلا المسلمات بعراضهن...,

والله ما قصدي اجرحتس بكلامي لكن انا ابصرتس بلي ما تشوفينه...,

الرجال الي جاي يخطبتس طبيب وهو من ربع نواف وجزاع درس معهم يعرفونه عيال اخوي من مبطي وهم صغار ..,

وتوه جاي من امريكا قريب وهو مثل حالتس..,

و عمره تقولين با الاربع وثلاثين حول جزاع او يمكن اصغر بسنه ...

عوق با استغراب \34ولاتزوج غريبه اكيد فيه بلا ..ّّ!!

ام ابراهيم بضحك\ لا ان شاء الله مابه غير الخير..,

ماتزوج عمره كله قضاه با الدراسه من طلع لدنيا وهو يدرس وهقوتي انه بعدللحين يدرس..,

انا يوم عرفت سالفته قلت بس هذا الي يصلح لبنتي عوق...

وحيدآ ماعنده الا امه عجوز فيهاشلل من اثر جلطه الله يشفيها وحركتها قليله..,

وامه يوم كان يدرس وهي بعافيتهاتروح وترجع عليه مرات تجلس معه..

ومرات تجلس بالمملكه نواف يعرفها مبطي ودايم يذكرها بخير..

يوم طاحت عن حيلهااستقر علشانهاهناوحاله ميسوروراتبه طيب

عنده بيت وضعهم زوين ماتقولين انه طامع فيتس ...,

ورجال فيه صلاح ماهو عاد بمطوع مثل طلبتس لكنه راعي صلاة ولا عنده خرابيط الشباب..,

ومن صغره محد انقده بشي عشرة عمر هو وعيال عبد الرزاق...,

والعيال دقوا صدورهم وحطوه بذمتهم انه رجال يستاهل وفيه من مخافة الله واجد..,,

والي يخاف من ربه بيخاف الله فيتس..,

والانثى يا بنتي وش تبي من الدنيا غير زوج صالح يخاف الله فيها

عوق بحيره\ يمه انتي وش رايتس...؟!

ام عوق\ انا الرجال خبرتني عنه ام ابراهيم قبلتس ..!

وكل الي وصلني عنه انه رجال ماعليه ومتفاوله فيه خير ..,

يا عوق انتي الحين ما انتي صغيره وانا يا بنتي ان عشت لتس اليوم الله اعلم باتسر..!

عوق بذعر \بسم الله عليتس عسى يومي قبل يومتس..,

ام عوق \الموت والحياه بيدالله ماهي بيدلا محب ولا مبغض يا بنتي شوفي مصلحتس جلوستس عندي مامنه فود..

عوق بملل\رجعتني لحيرتي وانا خلاص تناسيت شي اسمه زواج والتفكير فيه..,

وهذا انا مشغله نفسي بدراستي الي ماني عارفه راسي من كرياسي فيها..,

اردفت عوق بتهكم\اسمعن انا بستخير علشان ما تلوموني بعدين...,

ام ابراهيم بضحك\اغصبوني واتغيصب والله ياعويق لو تشوفينه ما شاء الله عليه انتس تدعين لي بكل صلاه..,

عوق بتوجس \لكن يا خاله وش الي يحده على وحده مثلي..,

ام ابراهيم با استغراب\انتي ماتفهمين وش انا اقولتس من اليوم..!!

مثل وضعتس الولد مجهول نسب ..,

سكت هذي الحقيقه يعني وش با اقول لكن استغربت ها الكلمه اول مره خالتي نوره تقولها بوجهي..,

ام ابراهيم على طول قامت ولحقتها بوصلها للباب وقبل تطلع لبيتها التفتت علي..!!

ام ابراهيم بترجي\ فكري زين يا عوق والله ما تلقين اصلح منه ووضحى له خاطر فيه مبطي ..

عوق بشرود\الله يقدم الي فيه خير..,

ام ابراهيم تضحك\ترى اسمه زياد..

.
.
.

(كلمه اخيره)




عجزت عن تخيل العالم دون ستر الله لنا..

ماذا لو كان للذنوب روائح؟

تخرج منا على قدر معاصينا!

ماذا لو كتب على جباهنا المعصية التي ارتكبناها؟

ماذا لو وجد على باب بيوتنا شرحا لما فعلناه؟

ماذا لو علم الناس بما ستره الله علينا؟

ماذا لو وماذا وماذا؟؟

الحمدالله على نعمة الستر

اللهم لا تنزع عنا سترك

واسترنا فوق الأرض وارحمنا تحت الأرض واغفر لنا يوم العرض

د. الشيخ محمد العريفي
.
.
.

الي الملتقى قريبآبأذن الله

  رد مع اقتباس
قديم 2015-01-18, 03:28 AM   #11
دلـ،ـع حَسبتّك . ♡
الصورة الرمزية وينــــــــــــك حبيبـــي
 
وينــــــــــــك حبيبـــي has a spectacular aura about وينــــــــــــك حبيبـــي has a spectacular aura about وينــــــــــــك حبيبـــي has a spectacular aura about وينــــــــــــك حبيبـــي غير متواجد حالياً

 


البارت العاشر
.
.
.

ام ابراهيم تبتسم\ترى اسمه زياد..!

سكت ما علقت ولا قدرت اقول كلمه..!

طلعت ام ابراهيم وانا رجعت لأمي

عوق بشرود \يمه تبين شي بروح غرفتي

ام عوق\تعالي اجلسي ..؟!

وجيت وجلست عندها

ام عوق \وش فيتس يمي كني اشوف خاطرتس ماهو كل هذا ..؟

اردفت ام عوق برجاء\ بطلبتس طلب هالادمي لاتردينه وانا استخرت بدال المره عشره قلبي مرتاح له..؟!!

وهذي وصاتي لتس يمكن يمسي علي الليل ولا يجي عقبه علي صبح اعيشه معتس ...,

انا حاسه ان ايامي قريبات ...

حضنت امي من قو كلامها وبكيت\ لا يمه لا تقولين كذا اناوين اروح ان خليتيني..

ام عوق وعيونها مليانه دموع\ يا بنتي ربي سبحانة مااظهر احد على غيبه ...!

وانا عشت بما فيه الكفايه والحين عمري فوق التسعين كل جيلي ما بقه منهم احد..,

كل ما نشدت عن احد من الي انا خابرتهم بسني قالوا الله يرحمه ربعي كلهم مشوا وخلوني ..,

الحمدلله ربي كان حارمني نعمة الظنا عوضني فيتس ..,

انولدتي على يدي وربيتس ..

ما قهرتيني ولاعذبتيني راضيه عليتس الله يرضى عليتس ..

يمكن لو انتس من بطني ما صرتي لي كذاوريحتي بالي ..

عمرتس ماعصيتيني حتى لوان الي اسويه لتس ما يعجبتس تبدين ارضاي على هواتس ..

سامحيني يا عوق ادري اني ياما قسيت عليتس ..

بس يا بنتي من خوفي يجيتس ماجا مشاعل..!!

مشاعل يوم جابتها امها وخلتها في ذمتي

بزير صغيره يوم قرب شهرها تقوم وتطيح من كبر بطنها مرات اقومها ما تقدر تشيل بطنها...,

اهملوها اهلها ويوم ابتلت رموها..,

تركوها مع ولد عمها تسرح وتمرح لاحسيب ولارقيب..,

وهو ولد اول شبابه ودمه فاير ويشوف ما يشوف من شين وزين خفى وبيان ولا احد يدري عنه..!

وهي على صغر عمرها عظمها كبير وزينهاواجد..؟

اختلو في بعضهم بليلة ظلمه وفرطت بنفسها على حروةانهم يتزوجون

تدرين ياعوق ان بدر اختلى في مشاعل مرات ...!!

ماهو مثل ماقالت لي وسميه يوم جاتني انها مره وحده وكتب الله ها الحمل..

بس الحقيقه غير...!!؟

الي محيرني ان البنت بزر وشلون ابتلت ها البلوى

من فتح عيونهاعلى ها السوالف الي كبرها لاهيات يلعبن..,

و اقعد اسولف انا وهي وانشدها وتعلمني..؟!

تقول اولها ناداها بدر بغرفته على شوفتن قشره با التلفزون جعله يمحق وصارت اول المصيبه..,

ومره في بيت اهلها والكل موجود ما غايب منهم احد

ما جا في بالهم ان ها الولد داخل طالع بين ها البنات وش يبي ...!!

ويمكن ابليس يزين له الفعل الشين..,

ومره بمزرعتهم تقول كنا طالعين اهلي وعماني ايام اعياد...,

وابوي اعجل با المرواح قبل عمي ..

وقال بدر لاتروحين مع اهلتس تكفين يا مشاعل اجلسي..,

ترجعين مع خواتي اهلي بيمشون متأخرين

واطلب امي وابوي اجلس مع بنات عمي..

امي ماجازلها ورفضت لكن ابوي هاوشها وقال محد بياكلها بترجع مع تركي وبناته خليها..!!

وجلست على اساس اني بقعد مع بنات عمي لكن الجلسه كانت لبدر..

زوجة عمي تحسبني مع بناتها مأمنه علي

والبنات كانوالاهين عنا الي نايمه والي مشغوله ..,

ونسوا حتى اني معهم كل وحده تظن اني مع الثانيه

ما تذكروني الا يوم جاو يمشون شافوني يوم رجعت معاهم..,

عوق بذعر\ياربي سترك يا يمه كل هذا ولا لاحظوا اهلهم..؟!

ام عوق بحسره وألم\الله يا بنتي يكفينا شر عمى البصيره ..

ربتس يستر مره ومرتين لكن وين الي له عيون ويشوف ..؟

تعلمني مشاعل وتقول انا من اسباب هلاكي خواتي وخواته ..!!

هم الي شجعوني وابليس مامات ...؟

بيتنا كنه بيت واحدوعايشين مع بعض وكلامهم لي جات خطيبة بدر وراح خطيب مشاعل..

وبدر دخل علي من ها الباب اطاوعه بلي يبيه غصب عني واقعد عقبها كم يوم مريضه وقلبي يوجعني..

يقنعني ان آخرتنا زواج ولا راح يتركني انا بنت عمه وماهو متخلي عني.

اناعارفة بدر صادق بكلامه لكن ما حسبنا حساب الحمل ولا حساب ان واحد منا يموت

والا حتى ملك الموت يمكن يقبض ارواحنا اثنيناوحنا على الرذيله..

حاسه ان الي نسويه مصيبه لكن ما لقيت الي يوجهني والا يسألني وش فيتس..؟!

واخرتها يوم كشفوا اهلي المصيبه عمي بغى يذبح بدر وتهدده برشاش ليش سوى سواته..,

انابنت عمه ولحمه ودمه وهرب بدر من خوفه من عمي وصدم..,

هو بغيبوبه ما يندري وش اخرتهاوانا عندتس مدري وش يجرالي ..؟!

لو ذبحوني بينفضحون وان اتركوني بينفضحون ..,

ام عوق ببكى \ياعوق هالغفلة تدرين وش سوت بمشاعل..؟

الضعيفه كم مره تدق علي با التلفون ..؟

تبكي شبابها الي اندفن مافي احد تشكي له بعد الله غيري..,

تقول ياخاله بعد ما طلع بدر من المستشفي ما يقدر يسقي نفسه الماء..

زوجوني ابوي وعمي له علشان نداري ها الفضيحه..

والعرب كلها متأسفه على حالي مع رجال ما يتحرك منه الا راسه ..

يمدحوني مشاعل ضحت بشبابهاعلشان ولد عمها تخدمه..

صرت بين جماعتنا مضرب مثل للصبر...,

وخواتي الي اكبر مني واصغر مني تزوجن ورافعات روسهن على طيب سمعتي..,

وحتى لو بتطلق محدبيلومني بدر عاجز..,

الحادث اتلف الجهاز العصبي عنده..,

من غير العمليات الي با الحوض والكل عارف بعجزه..

ان مات بدرانا داريه ان الي بيخطبوني اكثر من الي يخطبون البنا ت الي مااعرسن ببيوتهن..,

على اشاعة بنت الاصول الي اخذت ولدعمها ولا همها عجزه..,

وياما حريم ورجال نشبوا لأمي وابوي يبونهم يطلقوني من بدر علشان اشوف حياتي..!

وامي وابوي يردون مشاعل معيه وتزعل ان احد اطرى لها ها السوالف ..,

بدر خطبهاوهو متعافي يوم طاح عن حيله ماتبي تتركه..,

والله عالم با الخفيات...؟!!

حكمواعلي با السجن المؤبد بس الفرق انه سجنن كبير ما يشمله عفو..,

والعفو فيه يدخلني سجن اضيق منه..!

مجبوره انفذ الحكم لا ينكشف الي ربي ستره..؟!

حتى دراستي رفضوا ابوي وعمي اكمل خايفين علي مدري مني ..!

لا زوج ولا حياه ولا ضنا ماغير مقابله بدر وادفه على كرسيه وانا الي بعمري تو بدن حياتهن

خواتي وبنات عمي ضيعني بدون قصد والحين ادفع الثمن علشان لا تنخرب بيوتهن

بدر ما يواطن يشوف وجهي يصدد عني وانا ازود منه بس وش نسوي مضطرين نعيش مع بعض ..,

ياخاله عمرتس شفتي ميت يمشي مع الحيين هذا انا...؟!

شفتي ياعوق وشلون حال بدر ومشاعل ..!!؟؟


ادري ان قلبتس نارمنهم وشايله عليهم من عرفتي الحقيقه..

سامحيهم وانسيهم علشانتس انتي ماهو علشانهم..’

مشاعل اذا دقت علي ما تقدر تقول حتى وشلون عوق من خوفهامن الفضيحه...,

عوق من بين دموعها\خلاص يمه الي تشوفينه يصلح لي سويه ولا تشاورين..

ام عوق\ اجل وانا امتس استخيري وان شاء الله خير..

عوق \يمه انا ما اقدر اتركتس لو ربي بيكتب لي شي..!

ام عوق \هذي حلها بسيط بس خلينا ها الحين نشوف الرجال..؟
.
.

استخرت اكثر من مره وحسيت براحه يمكن علشان شفت امي فرحانه فيه انعكس على نفسيتي ...,
.
.
و بعد يومين ...
.
.

خبرت امي بموافقتي وتهلل وجها فرح وبكت ...

امي دموعها غاليه عليها على رهافة قلبها اذا سمعت قرآن ماتتمالك نفسها والا خطبه مؤثره..,

اما انها تبكي لشي ثاني شوفت دموعها قليله وكلها بسبتي فديت عيونها..!

عرفت ان زواجي من زياد يعني لأمي الشي الكثير والا ما ارخصت دموعها..!

امي كلمت ام ابراهيم وخبرتها بموافقتي وحذرتها مانبي احد يعرف شي ..؟

وخالتي ام ابراهيم قالت احسن راي ونبي نستعجل با الملكه ..,

والدنيا ماتنضمن ولا نبي الرجال داخل طالع ونطولها وهي قصيره ...!

بعد ما عطيت امي الموافقه ما ادري ليش جاني شعور بحيرةوخوف احس اني تحسفت ما ابي اترك امي..؟!

يعني معقوله لو با اشرط عليه اني ماترك امي بيوافق ..؟

وانا صراحه الزم ماعلي امي عندي اهم من نفسي..,

.
.

بعد ثلاث ايام
.
.


كلمتنا خالتي تخبرنا ان زياد بيجي يخطب رسمي ..,

قلت لأمي اهم شرط انا ما اخليتس..

ام عوق بحده\ اسمعي الهرج الي ماهو هرجتس انتي ماعليتس مني..

اشرطي الي يخصتس دراسه والا عمل..,

اما انا ماهو شغلتس بيني وبين زياد متفاهمين..,

قهرتني وش متفاهمين هي وين شافته كل الي بينا خالتي ام ابراهيم تجيب لنا اخباره ..؟!

عوق بأالم\يمه انا ما اتركتس لو يخرب ها الزواج كله..,

ام عوق بغضب\ما ابي اسمع منتس شي ياعويق وتفضحيني بسوالف فاضيه..

الحين الريا جيل جايه نبي نخلص قبل يطلع لنا شي يلدناويخرب علينا..


جات ام ابراهيم عندنا بعد العصر وقالت لها امي عن شرطي...

ام ابراهيم \عوق الرجال اخذ احتياطه وخلص اموره كلها..,

وجاب اوراق من الاماره والحين كلمني ولد اخوي يقول بعد المغرب جايين..,

تعوذي من ابليس وخلي امتس ترتاح..

وضحى مهي ضايعه وكانتس تبين راحتهااتركي عنتس الوسواس وابليس لا يلعب عليتس...

تسوين لنا زوبعه وتطول السالفه وعقب يخرب كل شي وخصوص الخطبه من تطول السوالف فيها تخرب..

اناامشي واحذرمسلط وعيالي لا يطلع خبر..!

ونبي الملكه بسرعةعلشانتس وعلشان امتس هاالضعيفه تطمن ..,

لحطت راسها على مخدتها ماهوجست بتس الله يهديتس بس ..؟!
.
.
ما ادري ليش خنقتني العبره وقعدت ابكي احس محدفاهمني..!؟

انا ادري اني حمل ثقيل على امي بس ماهو بيدي ما ابي ابتعد عنها..

كان قصدهاتزوجني خلاص تشرط على زياد اني اجلس عندها..

واذا ماوافق بكيفه بيجي غيره ما وقفت عليه..؟!!

ام ابراهيم بحنان\يا الله بنتي اغسلي وجهتس عن الدموع وتعوذي من الشيطان وسهالات ان شاءالله..

امي تضحك علي وتعلق هي وخالتي نوره..,

وانا قمت جهزت قهوة الرجال وبخرت المجلس احس داخلي شعور غريب..!

لافرح ولا زعل يعني يتم ها الموضوع او ما يتم عادي ..,

وجا زياد ومعاه ولداخو ام ابراهيم وابوابراهيم ورجال ثالث تقول ام ابراهيم انه اخوه..!

سبحان وش اخوه اذا هو مثلي من وين له اخوان..؟!

لا يكون العايله الي هو عندهم كافلين ايتام غيره..!!

يا الله ياخبر اليوم بفلوس بكرايصير بلااش..؟

قعدت اتقهوى انا وامي وخالتي ام ابراهيم ..,

ما سمعنا الا صوت ابو ابراهيم ينادي على ام ابراهيم..؟!

وطلعت له ورجعت قالت يا وضحى يبونتس..,

راحت لهم امي وجلست انا وخالتي ام ابراهيم..,

ام ابراهيم بترجي\ عوق ان طلبوا الملكه الحين لا تعارضين سمعت مسلط يقول ان الرجال مستعجل..!

خفت من كلامها \ لا وش ملكته ها الحين ...!

ورجعت امي واشوف عيونها من ورى البرقع تضحك..!

ام عوق بفرح\ عوق اطلبوني وانا امتس وعطيتهم ..؟!

الملكه باتسر الصبح با المحكمه..

وعمتس ابو ابراهيم يجي معانا اذا احتاجوا وكيل والا شي الاهو موجود..!؟

عوق بملامه\ يمه ليش العجله ما توقعت كل شي بسرعه ..!

ام عوق بضحك\هم بغوها الليله لكن وضعتس غير انتي لازم با المحكمه..؟!

واقعدوا ام ابراهيم وامي يسولفون عن زياد..!

ام ابراهيم بمزح\هاه يا ام عوق وش شفتي من نسيبتس..؟

ام عوق بااعجاب\والله يانوره الولد من دخلت عليهم مارفع راسه مستحي وقليل هرج..!

لكن اذا تكلم كلامه موزون ما شاء الله عليه..,

ام ابراهيم تضحك \مسلط والعيال طايرينن فيه ويدعون يا الله انك تجعله من نصيب عوق

ونمرالعياريفتح جيبه ويتوجه للقبله ويدعي يا الله انك تجيب نمر..!

اردفت ام ابراهيم بدهشه \ما قالتس ورى الحريم ماجو معه..؟!

ام عوق \يتعذر يقول امه ماجات تعبانه الله يشفيها..,

وخواته ودهم انهم جو معه لكن انشغلن بعويلهن يقول تنعوض با العرس ان شاء الله..,

ام ابراهيم بتأكيد\اجل العرس ماهو بعيد يوم قال تنعوض با العرس..!

طلعوا الضيوف وام ابراهيم رجعت لبيتهاوبقيت انا وامي احس ماني على بعضي ومضطربه..!

ام عوق بتساءل\ وش فيتس يا بنتي وش انتي خايفه منه والله ما تلقين مثله..,

تكتور وتوه شباب وما شاء الله قاضب عقله وانتي وهو مثل بعضكم الليالي يا بنتي ما كلها سمحةمحيا..!!

ولا انتي خايفه باتسران زعل عليتس والا ضاق خاطره منتس والا احدانغزه عليتس جاوعيرتس وكسر عينتس ..,

انتي وانتي والي فيتس ما يخطيتس...ّ!

ما يقدر يقول شي عيبتس وعيبه واحد...,

عوق بوجع\يمه توني احس ان مالي والي ومقطوعه..

ام عوق بأالم\السوالف والتحسر كلها مهي مسوي لتس شي

لكن يا بنتي خوذيه مني وصاه واقضبيها للممات لايطري لتس بيوم من الايام...,

لاانتي نايمه والا قاعده انتس تعطينه خبر عن اهلتس..!

والا تجيبين طاري انتس تعرفينهم ماهو الي دفناه انا واهلتس تطلعينه له..,

ترى ما انتي مستفيده غير الغبينه والفضيحه..,

تفضحين عماتس وخالاتس وانتي ما يتغير شي بحياتس ..,

وكل ما ذكرتس وحدتن منهن قامت تدعي عليتس..,

تشوشين عليهن وتفطنين عدوانهن وبيوتهن تنخرب وانتي تبقين مجهولة نسب محد يعترف بتس

حتى ان صادفتيهن بطريق والاسمعتي بطاريهن كانهن شرق ابعدي عنهن غرب..,

الدنيا صغيره وانتي تعرفينهن من الاسامي..

تبين تسمعين يوم عن بنات خالد والا تركي ..!

لكن هن ما يدرن عنتس سدي اذانتس وابلعي اللسانتس عن طرياهم..

عوق بحسره\الله يسعدهن ويبعدهن ما قصرن خيرهن سابق..!!

ام عوق \ انتي عاد اقضبي العلم ولا علينا منهن هن بطريق وحنا بطريق ..,

اردفت ام عوق بفرحه \اشوفتس ما نشدتيني عن زيادانا قلت الحين تبلشيني وش قال وش ما قال..!!

عوق بشرود \عادي مادامه معجبتس خلاص انا وش ابي من لدنيا غير رضاتس..,

ام عوق با ابتسامه\الله يرضى عليتس اي والله انه معجبني

وخصوص يوم قال ياخاله الزم ما علي امي تراها مريضه..

وقولي لعوق الي ماتبي امي ماتلزمني من ها الحين ..

قلت لا بالله حنا الي ما يبي امه مانبيه ...,

وشرطت عليه ما يمنعتس لا من علم ولا شغل والرجال ما قصر وافق ..,

وحتى المهر قال اطلبوا الي تبون قلت له الي تجيبه راضين فيه...,

حنا دارين ان خيرك واجد وانت داري ان خيرنا واجد...,

اردفت ام عوق بفرحه\يا سقى الله يا عوق يوم اشوف عويلتس يلعبون حولي

عوق بحزن \الله يستر يمه حاسه انا استعجلنا خايفه من الندم..؟!

ام عوق \لا والله ان شاءالله انها ماهي على ندامه وتشوفين ياعوق ..!

ان بيجي يوم تقولين الله يوفق امي الي زوجتني ها الرجال..؟

نوره ومسلط زكو الرجال عندي وها الثنين امشي وراهم وانا مغمضه..,

اردفت ام عوق بضحك \ماتبيني اعلمتس ليه نوره ما صارت امتس ..!

عوق تبتسم بوهن\ كم مره بسألتس وانسى يا الله علميني..؟!

ام عوق بضحك\ تاخذيني على قد عقلي لكن بعلمتس...!

هذا وانا امتس يوم اجي بتس من البر عمرتس 3شهور وعليها تقولين 4شهور..,

وسكنا بيتنا الشعبي الي انتي خابره ومن كثر العذاب الي شفتيه غديتي جلد وعظم..,

وخفت من الرعايه هم كل فتره لازم يشوفونتس ويتطمنون على حالتس...,

وان شافوتس تعبانه اخذوتس مني يخافون لاسمح الله يصير لتس شي..,

نوره ذيك الليالي توها والد بريم وصغيرة سن لكن قلبها ما شاء الله حي ..,

وامها عندها واجي واشورهن قلت يا بنات الرجال انا كفلت ها اليتيمه ابي آجرها وعساني ما اشيل اثمها..,

وهي قربت4 شهور ومن شافها قال توها مولوده..؟ّ!

وتاخذتس طخايم ام عبد الرزاق الله يرحمهاوتقلبتس وتشوفتس وهي ما شاء الله عليها طبيبة ورعان ..!

قالت ياوضحى البنت معتله وداخلها هوا وفي حلقها عظيم ساد حلقها عن العيشه..!

البنيه بلاها الحليب الصناعي لكن ان شاء الله ان امرها بسيط ..!

وتصلح لتس دواءواعطيتس منه وزان حالتس وقمتي ترضعين وتعافيتي ..!

بيوم اسولف انا وطخايم قلت لها وش رايتس لو اطلب نوره ترضع عوق وش تهقين هي توافق..؟

قالت ما ضنتي بتعيي لكن اطلبي اخوتس مسلط ..!

لكن يا وضحى والله ان لتس هدف مير علميني فيه..؟!

قلت والله هدفي ان عوق يغدي لها اخوان من الرضاعه بدال ما تطلع لدنيا بلحيلها والرضاعه محللها الله ..,

واطلب مسلط ولا قصر قال عوق مثل ريم كان نوره وافقت انا ما منعها..,

وحاولت نوره ترضعتس ولا قدرنا كل ماجات ترضعتس قعدتي تصيحين ..؟!

قلت اجل ربي ماهو كاتب ها الخوه ومن يومها دريت انهم ناس فيهم خير..,

وقلت بس هذولا الي ماتبدل عشرتهم ..,

عوق با استغراب\سبحان الله يمه الاصيل اصيل قريب والا بعيد..

ام عوق \انا اشهد والله ما يسوي سواياهم الي من اللحم والدم..,

ويا الله قومي وانا امتس نامي لا تروح علينا صلاة الفجر

ترى ورانا مشوار من الصبح ..,

وقمت من عند امي لغرفتي..,

انسدحت على سريري وبدت الافكار تخابط براسي..؟!

يعني بكرا ملكتي خلاص الحلم الي كنت احلمه بيتحقق ..؟!

لكن ليه انا ما احس بشي يمكن اميل للحزن اكثر في ها الليله...!

زياد جاي با الحاله لا ابو ولا عزوه جاي مع صديقه وشخص ثاني يقول انه اخوه

ومن يخطبني منه من جارنا...!!؟

مهما كانت مميزات زياد بتظل فرحتي مبتوره ومشوهه ..,

لا اب ولا اخ ولاخوات ولا عزوه اشد فيها ظهري

وليي الشيخ الي بيعقد لي والا جارناابو ابراهيم الي هو من قبيله وانا من قبيله..!

العزوه سعد وسالم ولو دروا بينشبون لأمي...؟!

بتزوجين عوق وفلوستس بياخذها الغريب ..!

حتى مشاعل وساره اختفن من حياتنا..!

غير مكالمات مشاعل لأمي وضحى وشكلها با السر كل ما ضاقت عليهاالوسيعه دقت على امي تفضفض لها..!؟

يا ترى يا زياد بتكون لي نعم الزوج والا مثلك مثل غيرك عندك هدف..!؟

يارب يسر اموري واجعل لي من كل همآفرجا ومن كل ضيق مخرجا...’

.
.
.
.

ثاني يوم طلعنا للمحكمه انا وامي ومعنا ابو ابراهيم بسيارتنا..

ابو ابراهيم\عوق..؟!

عوق بخجل\نعم عمي..!

مسلط\ قولي الي بخاطرتس قبل نوصل للمحكمه والله يا بنتي ما اشوفتس الا مثل رويم وخياتها ..,

عوق بخجل\جعلك سالم غانم يا عمي ما ابي شي غيران شرطي ما ابعدعن امي..,

مسلط\هذا ماهوكلام وانا ابوتس زياد رجال فاهم ولاهو قاطعتس من امتس وها الشرط ما يصلح

والرجال يطلب المره لزواج يبي يستقرويعيش ويبدا حياه جديدة..,

وغير هذا امه الي عنده مريضه وين يروح به وانا عمتس يرضيتس يترك امه ويتبعتس...!

ام عوق\يا ابو ابراهيم ذبحتنا ذبح تقل ان ها الرجال بياخذها لأخرالدنيا..!!

وتزعل علي يوم اقولها ان شرطها اعوج ماله سنع..!؟

مسلط\افااا وانا ابوتس انا اقول عوق الفهيمه العاقله وشلون يطلع منها ها الكلام..!

زياد حبيب واجودي والله لو اني ناقد عليه بشي اني ما صفطته لتس ..؟

لا بالله دوري شروط غير ها الشرط الي ما يجوز..؟

واذا ازعلتس والا مامشى بشروطتس لايردتس غير تلفوني دقي علي وشوفي وش يسوي عمتس مسلط..!

بكيت بقلبي ما ابي امي تحس بشي من كلام ابو ابراهيم الي حسسني اني انسانه..,

وعندي ظهر لو باالكلام..؟!

وقفنا عند المحكمه وابو ابراهيم نزل سلم على رجال دخلو قدامنا..,

ورجع علينا وقال لنا انزلوا هذولا الربع ..؟!

نزلت انا وامي وتمت الملكه على خير ...,

ولا ادري اي واحد فيهم بيكون زوجي ..,

يسألني الشيخ واجاوب وقعت بعدها وانا ما ادري وش وقعت عليه..!؟

والا وش قلت لشيخ حسيت نفسي مثل العميا او بحلم ..!

كل شي تحول لسواد قدامي حتى امي الي يدي بيدها اختفت من قدام عيوني..!

وانا الي كنت ناويه اشوف شكل الي ذبحوني امي وخالتي يمدحونه..!؟

طلعنا من المحكمه وابو ابراهيم نادى امي لرجال واقفين عند سيارتين واقفات جنبنا..؟!

وانا ركبت سيارتناانتظر امي واناظر من تحت الغطا..,

لرياجيل الي امي راحت لهم ملامحهم واضحه حيل واقدر اميزها..!

ياربي اي واحد منهم الي بيكون زوجي ...؟!

الثلاثه كلهم لابسين نظارات ..؟!

واحد فيهم لابس نظاره شكلها طبية وطويل وابيض ونحيف وله شنب خفيف وعوارضه خفيفه..!

والثاني لابس نظاره شمسيه طوله يميل للقصر اكثر واسمر ومليان وجهه احس ماهو غريب وحالق لحيته وشواربه..؟!

والثالث طويل واسمر سماره غامق ومشيته ماهي طبيعيه زي الي يعرج وعرج واضح مره وعوارض محدده..؟!

ونظارته طبيه حتى شكل النظاره واضح ان عنده ضعف نظرشديد..؟!!

سبحان الله قلبي حاس انه هذا هو زياد لأن شكله خجول ومثل ما قالت امي امس مستحي مارفع راسه ..,

كل الي واقفين يسولفون الا هو ساكت ومدنق ماناظر سياراتناغير عن اثنين الي معاه شادين حيلهم با السوالف مع عمي مسلط وامي

اكيدهذا هو الي وقعت اني قبلت فيه زوج لي..؟!

والثانين هم الشهود على العقد..,

با المحكمه انعميت ماسمعت الا صوته ليتني رفعت راسي يوم يسألني الشيخ وشفته..!

الاسمر المليان يمكن اخوه ..!؟

والابيض اكيدقريب ام ابراهيم تبارك الله يجنن وشبلاه كل شوي يسلم على راس عمي مسلط...!!؟

كنه يطلبه شي طايح تحبب براس عمي مسلط وعمي مره يضحك له مره يهدده با اصبعه ..,

يا الله تذكرت كلام ريم يوم توصف جزاع ايام خطبتها..,

هذا الي طول وبياض وسكبه ماهو جزاع والله عمي مسلط صاير كنه ولده ...؟!

الظاهر ان ذاك الوقت عندها عمى الوان..!!

لو كنت مكان خالتي نوره وهذا ولد اخوي اني لأزوجه من بناتي..!!

استغفر الله ياربي اكلت الرجال بعيوني ياربي تسامحني..,

راضيه با الاعرج ولا اعتراض على قسمة ربي لي ..,

ياربي استغفرك من كل ذنبآاغترفته بنعمة البصر..,

اللهم اني رضيت بقضاءك وقدرك فأعطني حتى ارضى..,

اهم شي رجال مثل وضعي ويعفني ويحميني من مصايب الايام ومعجب امي يكفيني هذا..,

جات امي تتكي على عصاها ونزلت الشغاله تساعدها تركب السياره وركبت..,

اليوم امي غير فرحانه ..!

من الصباح صاحيه ونشيطه ..,

سبحان الله فرحت امي بزواجي نستها حتى تعبها الروماتيزم الي متعب رجولها

عوق با استغراب\يمه وين عمي ماهو راجع معانا...!

ام عوق بضحك\ لا بالله يقول ماني خويكن بيرجع مع بناخي نوره التكتور..

وحلف ان عشا الملكه في بيته احرجني انا وزياديقول عوق بنتي ومثل ما سويت لريم بسوي لهاوانا وافقت..

وصلنا بيتنا ونزلنا..’

ام عوق \الرجال بيجي العصر يشوفتس جهزي عمرتس وبيجون معه حريم...

ما رديت على امي ودخلت غرفتي صدمتني امي بكلامها..!

وش اسوي لو هو با الحاله بمشيها لكن معه حريم..!؟

انا كل لبسي تنانير وقمصان عمري ما فكرت اشتري فستاين ما احضر مناسبات ..,

يا فضيحه والحين قرب صلاة الظهر وش بسوي ..؟!!

يا الله حسبنا الله سيؤتينا الله من فضله انا الي الله راغبون..

نادتني امي قالت خالتس ام ابراهيم على التيلفون تبي تبارك لتس ..,

ام ابراهيم بفرحه\ الف مبروك وعساه زوجتس با الدنيا والاخره..,

ريم يوم درت با الملكه جتنا طايره حتى ماهو مشي خوذيها بتبارك لتس..,

ريم بفرح \ مبروك عويق..,

عوق بتوتر\ الله يبارك فيتس وتعالي طيران مثل ما طرتي من بيتس الحقيني نكمل سوالفنا عندي ضروري ضروري..؟!!

تروعت ريم درت اني طايحه بمشكله جات بسرعه سلمت على امي الي اليوم هي الي تضاحك ضلالها وتسولف على نفسها..!!

ودخلت غرفتي انا وريم

عوق با ارتباك \ ريم دبريني الرجال بيجي يشوفني هو اهله وانا ما عندي شي يجمل انزلي لسوق وجيبي لي فستان ..!!

ريم تناظر ساعتها بقلق\ ما بقى على الاذان ساعه وين القى محل فاتح..؟!

عوق با اصرار\بكيفتس دبريني انا بجلس هنا ارتب مع الشغاله ..,

تعرفينهن ما عليهن اتكال وانتي اطلعي السوق خوذي صرافتي معك ..؟!

ريم\ شوفي بطلع ها الحين لسوق قبل كم يوم شفت فستان..!

اعجبني مره لكن ماهو مقاسي يبي له شمحوطه مثلتس ومليانه..,

اتوقع يضبط عليتس لكن عساني القاه..,

تعرفين يا وخيتي القصر شين والنحف اشين وانتي وحظتس ..!

عوق بتهكم \اذا على حظي اعرفه اعرج لكن لا اشوفتس راجعه الا بفستان..!

ريم بدهشه\ وش عرجه يا بنت والله ان شاء الله انتس صبرتي ونلتي ..,

عوق بقلق \ بسرعه ريم سوالفتس ما تخلص جيبي بس فستان كل شي عندي موجود..!

طلعت ريم وانا سويت حالة استنفار با البيت بيتنا نظيف ومرتب يعني من الي بيحوسه..!؟

لكن زيادة الخير خيرين اشوف امي فديتها تناظرني وتضحك ..!

اليوم امي رجعت 40سنه ورى من فرحتها فيني بسم الله عليها ..,

خلصت شغلي خلال ساعه حتى الحلى حجزت..,

رجعت ريم بسرعه من السوق

ريم بضحك \ابشرتس لقيت الفستان متمسك با المحل معيي لايطلع يبيتس..!

يهجهج عن الزباين يا ام حظ اعرج..؟!

اليوم حظتس ان شاء الله بيصير له اربع رجلين وماهو اعرج يا ام التشائم..!

اخذت كيس الفستان من ريم تعرف مقاسي وهي ذوقها رايق دايم اكيد بيجي ضبط ..,

ريم وهي مستعجله\ بروح واجي ان شاء الله وقت ثاني تركت عيالي عند امي..,

جزاع ان درى اني تاركتهم بيوجهني للقبله وينحرني..

عوق بتردد\ريم..!؟

ريم بملل مصطنع\نعم بعد وش تبين فستان وشريناه لتس ومكياج تبارك الله ما يصف جنبتس احد

اي صح لا تفكرين تلبسين صنادل واطيه والله ان تروحين فيها شفتي طولتس الي انتي بازتن به اليوم ما ينفع

إن كنت ريحا فقد لاقيت اعصارا.

قولي ما قالت ريم ...!!

عوق منحرجه\ اكيد بلبس كعب بس بغيت اسأل...؟

ريم بدهشه\وش بلاتس تغاصصين اسألي ...!

عوق بتردد\لا بس الي يقرب لكم الدكتور فيه شي تعبان مريض رجوله فيها شي...!؟

ريم با استهزاء\وليش تسألين عرس واعرستي لا اشوفتس تسألين الا عن زياد...؟!!

عوق\لا والله بس كذا سؤال طرا في بالي ..,

ريم با استغراب\لاما به بلا بسم الله عليه الحريم الي يخطبونه من خالتي اكثر من الي يخطبون خواته..

اردفت ريم \يجنن يهبل يطير العقل بياض وطول يقول ابوي حضر ملكتس وشهد عليهاما شفتيه با المحكمه

عوق بشرود \لا ما شفت ابشرتس الا حظي الاعرج ...

.
.
.


(كلمه اخيره)



الإنسان يلح على ربه في الدعاء ولا يستصغر أمرا مطلوبا وليعظم المسألة فإن الذي تناديه تدعوه ترجوه رب عظيم جليل لا تنفد خزاءنه البته (مَا عِندَكُمْ يَنفَدُ وَمَا عِندَ اللَّهِ بَاقٍ) ألا ترى إلى النبي الله سليمان وهو يستجدي رحمة ربه (قَالَ رَبِّ اغْفِرْ لِي وَهَبْ لِي مُلْكاً لاَّ يَنْبَغِي لأَحَدٍ مِّنْ بَعْدِي إِنَّكَ أَنْتَ الوَهَّابُ).


(الشيخ صالح المغامسي

.
.
.

الي الملتقى قريبآبأذن الله

  رد مع اقتباس
قديم 2015-01-18, 03:30 AM   #12
دلـ،ـع حَسبتّك . ♡
الصورة الرمزية وينــــــــــــك حبيبـــي
 
وينــــــــــــك حبيبـــي has a spectacular aura about وينــــــــــــك حبيبـــي has a spectacular aura about وينــــــــــــك حبيبـــي has a spectacular aura about وينــــــــــــك حبيبـــي غير متواجد حالياً

 

البارت الحادي عشر
.
.
.

اردفت ريم \يجنن يهبل يطير العقل بياض وطول..,

يقول ابوي حضر ملكتس وشهد عليهاما شفتيه با المحكمه...؟!

عوق بشرود \لا ما شفت ابشرتس الا حظي الاعرج ...

اردفت عوق بخيبة امل \ما شاء الله هوالابيض وطويل مره ..!

ريم بتهكم\ امزح معتس لا ابيض ولا طويل وش بلا خشتس قلبت دافع البلا طماط ماهو وجه..!!

ومنين بيجيهم الطول والبياض وخالي عبد الرزاق وخالتي نفلا وراهم..!

وش فيتس انتي نسيتي اخو رجلي نواف الي باامريكا ..!!

كم مره وانا اقولتس اخو جزاع يدرس طب با امريكا..؟

بعدين كل عايلة خوالي شيون ازينهم واملحهم واطولهم جزاع اي صح نسيت وامي بعد..؟

ما ادري كيف ها الاثنين طلعوا من ها العايله الظاهر طفره جينيه..!

عوق بضحك\ يا ليل جزاع والله من يوم شفت اخوه وانادايخ راسي افكروين شفته..!؟

تخبريني التشبيه هوايتي الا نسخه من جزاع الي طفره صدق هي خالتي نوره..!

ريم تهز راسها بضحك\ وهذا وانتي ما شفتي احد..!

مقبوله عروس وكل شي نمشيه لتس يا ام حظ اعرج..,

يالله بروح السوالف على البيبان ما تخلص اكثر من سوالف المجالس...!!

لا تطلع علينا الوضيح وحنا على الباب تعرفينها ماتواطن الوقفه على البيبان...؟

والله لتطردني ولا عليها مني ..,

عوق بضحك \ فديتها اليوم ماهي حولتس فرحانه..,

ريم بضحك \عساها دايم افراحها ام العوق تحتاجين شي قبل امشي..!

عوق \تخبريني تربية عجايز كل شي تلقينه عندي ما كان ناقصني الا الفستان...,

ريم\اقول بس لاتنسين دوري كعب طوله متر والا ترى بتورطين ..!!

كان مالقيتي ترى كني اليوم شفت انفال مطلعه من دولاب خالاتها على قولتها كعابه..!

شكلها جديده ما لبست بنهرب لتس واحد...!!

عوق\لا ما عليتس عندي كعابه واجد على قولة نفوله...,

طلعت ريم وانا دخلت بشوف الفستان وطلعته من الكيس..!

ريم كانت شاريه الفستان من حسابها وكاتبه بكرت صغير ..!

الف مبروك عوق هديه بسيطه مني وبطاقة الصراف مع خالتي وضحى...

آآآخ يا ريومه من يلومني بغلاتس يصبح ضريرفاقد شوف عينه ويتلمس عصاه..,

طلعت الفستان الي كان لونه خربزي ومقاس جسمي با الضبط ..,

ريم دايم تقول ها اللون ما يصلح الا على عوق يطلع بياضها..!

لكن الله يسامحتس ريومه وش بقى من ظهري واكتافي ما طلع..!؟

لو تشوفه امي حلفت ما البسه هي حتى البجامات ما ترضى البسهن تقول لبس ما خيط علشاناولا هو لنا...,

لو تشوف هذا وش بتقول لكن بدبره ان شاء الله..!

ها الشعر الي اربي فيه سنين هو اليوم الي بينقذني من زعل امي..

شيكت على كل شي وصلت طلبية الحلى بقى اجهز عمري ..,

يا حسرتي على حالي كل شي انا اسويه لنفسي عساني ماتحسر با اخرتي ...,

اخذت دش وصلحت شعري وحطيت ميكاج بقى الفستان ماراح البسه حتى يوصلون الضيوف..,

افكر كيف بدخل على اهل زياد لا قدامي ولا وراي غير امي فديتها

من بيقهوي الضيوف والا يشوف واجبهم لتس الله يا عوق...,

جات الشغاله قالت عوق تعالي ماما تبغاك ..!!

وطلعت لقيت خالتي ام ابراهيم وبناتها ملاك وروان والجوهره وشغالتهم وباركت لي هي وبناتها ..!!

ام ابراهيم با ابتسامه \ تحسبينا بنتركتس بمثل ها اليوم..؟!

اجل ما فيناخير يا بنتي فهمي البنات وش تبينهن يسون وش ترتيبتس..

لضيوفتس وانا عيني من وراهن والخدامات بيقهوون وانسي كل شي الا انتس عروس..

وشوفي التورته هذي من نواف مرسلها يقول باركي لعوق وقولي والله انها ان شاء الله ما تندم على ها الزواج..!

ما ادري وش جاني واقعد اصيح ماالوم امي يومها تغلي هاالعايله وتقول الله عوضنا بهم عن القرايب الادنين..

الدموع حاست شكلي وتقعد امي وام ابراهيم والبنات يضحكون..!!

ما ادري على شكلي والا هم يشجعوني علشان ما ابكي..!

قلت لبنات ام ابراهيم ترتيباتي ودخلت اعدل شكلي خلصت ولبست فستاني ..,

ورقعت الفضايح الي ورى لا تشوفها امي بشعري الي كان مغطي كل ظهري..,

يا ما تمنيت اني اقصه وامي ترفض تقول ستر الانثى بشعرها..,

وجلست بغرفتي انتظر امي وام ابراهيم ينادوني

الشغاله جات وخبرتني ان في ضيوف جو..؟!

بعدها ام ابراهيم جات لغرفتي..!

ام ابراهيم با اعجاب \ ماشاء الله تبارك الله ياعوق قمر بسم الله عليتس..,

حصنتي نفستس العين حق لو من عيونا وانا امتس والاحتى انتي تفزين بعمرتس..,

عوق با ابتسامه\ياليت كل العيون تشوفني مثلكم بدون ماتقولين ما اترك اذكاري فديتس..,

ام ابراهيم بتحذير\ما ابيتس تدخلين انتي عليهم..؟

عوق \ داريه انا مجهزه غرفةالجلوس الثانيه لكن من الي جا..؟!

ام ابراهيم\الي جاوثلاث حريم وحده الله يشفيها تدفها شغالتها بعربيه الله العالم انها امه..,

واثنين شكلهن يقربن لها يشبهنها سمر الاجوديات مثلها..,

طلعت لغرفة الجلوس علشان يشوفوني واكيد لازم اشيك على كل شي قبل يدخل زياد واهله

الحين هو ماله اقارب الا هذولي امه والحرمتين والا يمكن مقطوع مثلي...!

خالتي ام ابراهيم وبناتها ماقصر و لو كانوا خواتي ما اهتموا مثلهم الحمدلله كل شي مضبوط..

ام ابراهيم\اقول لوضحى خلاص تناديهم..؟

هزيت راسي با الموافقه وجلست انتظر دخول حظي الاعرج ..!

الجيران صارو اهلي بدال ما امي والا خالاتي وعماتي يكونون حولي ..

مكسوره من كل جهه يا عوق احمدي ربك على الاعرج على الاقل امي راضيه عليه..,

وضعه مثلي وظيفته مرموقه دكتور وش ابي غيرها ..,

يكفي كلام امي البارحة لازم اقطع كل طريق يوصلني لأهلي واوله الزواج من مجهول نسب مثلي ...

امي صارت مثل شمس المغربيه كل مامر الوقت تبعد..,

واهلي مافي امل حتى بحلم الليل اني ارجع لهم والا يعترفون فيني..

صحيت من افكاري على امي وهي واقفه جنبي وتقول ادخلوا حياكم الله هذي بنتكم...!!

دخلت حرمه كبيره على عربيتها سمينه مره وسمرا حيل...!؟

وجها مريح من يوم تطالع فيه تحس براحه ومبتسمه تدفها شغالتها..

ودخلوا معاهاثنتين ذكروني با الموجهات ايام المدرسه سبحان الله يشبهون زياد كيف يقولون مجهول نسب مثلي..!!

واكيد ام ابراهيم فديتها واقفه بعباتهاوغطاهاوامي بجلالها وبرقعها...,

بقى زياد للحين ما دخل سلموا علي الحريم ...!!

وانا قمت وسلمت على راس الحرمه الي على كرسيها ورجعت لمكاني..,

وحده من الحريم \بنادي زياد..؟ّ

وطلعت وثواني ودخلت وراها رجال ماسكته مع يده شفت طرف ثوبه الابيض وجزمه سودا..,

استغفر الله بغيت اضحك تذكرت خبال ريم..!

يوم تقول لاينكسر كعبي ثم يسحبني جزاع يحسبوني الناس بنته ...,

رفعت راسي بشوف وجهه يوم ما اقدرت اشوفه با المحكمه..,

الي دخل ماهو الاعرج الي دخل الثالث الي معهم الي حتى استحيت امس اني اتخيل انه هوزياد...!

ياربي لك الحمد انه هذا يارب اربط على قلبي ولاتفضحني اقعد اتضحوك قدام ها الحريم..!

بغيت اسجد سجود الشكرلو ما خفت يمسكونها علي..ّ

هذي ما صدقت تعرس ماكذبتي يا الوضيح يوم قلتي بيجي يوم تقولين الله يجزي امي خير..!!

ياربي لك الحمد جااليوم اسرع مماتصورت..!

سلم على راس امه وهي على كرسيها واشر من بعيد بيده لأمي ولخالتي ام ابراهيم..

يوم جلس جنبي تقعد امه تصيح قام وبرك عند رجولها يمسح دموعها وكنه الي ترضاها..؟!!

ياربي هي وش بلاها تبكي يعني ما عجبتهاوالا متحسفه ولدها فيني..؟ !!

زياد بمحبه\ ليه يا امي ها الدموع ...!؟

انتي الي ذبحتيني تبيني اتزوج وهذاانا نفذت كلامك لا يكون بس تندمتي..!

ام زياد بصوت واطي\الحمدلله الحمدلله..

عوق بنفسها\ياربي لك الحمد شكلي اعجبتها كنها تقول الحمدلله..,

يارب تطول بعمرها وعمر امي ..,

زيادقومها من كرسيها وجلسها با الوسط بينا..,

وقعدت تضحك مستانسه حسيتها مثل الطفل وحتى كلامها متقطع..؟!

حركته جدآ اعجبتي اكيد الي يعامل امه كذا ماراح يقطعني من امي

معقوله في احد با الدنيا يحب امه اكثر من حبي لأمي وضحى ...!!

وجلسوا امي وام ابراهيم والحريم الثنتين الي معاه قبالنا..,

قامت وحده من الحريم معاها كيس طلعت منه علبه كبيره قالت لزياد لبس زوجتك..,

ونزلت العلبه على طاوله قدامي..,

وقام وفتح العلبه ولبسني دبله ومعاها خاتم وهو واقف قدامي وانا ما رفعت راسي

يوم وصل للعقد ماعرف يفتحه واسمعه يعلق يقول نجلا ءافتحيه والا كسرته..!

وقامت الي اسمها نجلا وفتحته له..

نجلاء\انت وحده من ثنتين يا قروي يا تستظرف..!

ما يبيله عرف والا شوفت عوق خربطتك ..!

زياد يضحك\لا بالله شوفت عوق ما خربطتني الا حاستني..!

دنق علي يبي يلبسني العقد وحسيته خنقني وهو يحاول يلبسني..!

ماعرف يصك مفتاح العقد ورفعت راسي وطاحت عيوني بعيونه..,

حسيت سهم خرق قلبي وترني زود ما انا متوتره..!

وتلخبطت ما قدرت انزل عيوني وحراره ضربت جسمي ..!

واختفى كل شي حولي ما عاد اشوف الا عيونه وشكلهاالغريب ..؟!

اول مره اشوف لون عيون سود كذاوعدسة عينه مره كبيره..,

غمزته لي رجعتني للواقع يارب سترك هذا الي امي تقول يستحي هذا وشلون لو ما يستحي..!

ورجع وراه بغى يطير التورته على الطاوله حتى الحريم قامو يسمون عليه

جلس جنب امه واشوف الحلق والاسواره داخل علبة الشبكه شكله نساهم..,

امه اشرت له تبي ترجع لكرسيها..,

وقام ساعدها حتى جلست على كرسيها..,

جلس جنبي احسه كل شوي يزحف حتى قرب جنبي مره..!

وانا اشوي والا اهرب ما مسكني الا حافة الكنبه..

صدق تمنيت اتزوج وليالي كثيره اتخيل اني بحفلة خطوبتي..!

وكيف بلبس واجلس واتكلم لكن يوم صار صدق تغير كل شي...

لساني انربط وجمدت في محلي ماعاد اقدر اتحرك زادها قلبي الي قام يعورني..,

ما ادري وش جاني من حطيت عيني بعينه..!!

صحيت من افكاري على شي ورى يسحب شعري قلت يمكن يوم تحركت جلست على شعري..,

حاولت اتحرك بسم الله الا زاد الشد على شعري..؟!

كنه ناشب بشي مديت يدي برفع شعري الا لمست يد..؟

واجمد بمكاني يوم عرفت انها يدزياد هي الي تجر شعري..,

يارب سترك هذا اولها الرجال ماهو صاحي ما صدقت فكيت يدي من يده..

كنه ينتظرها علشان يمسكها ما فكها الابعد ما بغى يكسرها..؟!

ورجع يسحب شعري بسم الله وش جاه ..؟!

حسيت فيه يأشر للحريم الي قبالنابراسه ..!

نجلاء \وش رايكم يا ام عوق نخلي العرسان با الحالهم شوي..!

ام عوق با اصرار\ لا والله يا بنتي مالتس لوى ماحنا بطالعين هذا حنا جالسين ومتونسين ..

الحرمه الثانيه بترجي\عاد يا خاله خليهم شوي ياخذون راحتهم تراه زوجها..

ضحكت ام عوق\ انا ماعندي راحات زوجها ما قلنا شي ولويبيها تمسي في بيته ذا الليل ما منعته..

يشهر زواجه وياخذ حرمته ما ارده من شرع الله وياخذون راحتهم ويشبعون من مقابل بعضهم ..

زياد \ترانا جالسين يا بشرى وخالتي معها حق..,

عوق بنفسها \لقط وجهك مسوي ذكي..

زياد بمكر\ خاله انتي عند كلمتك والله انه احلى خبر اشهر الليله العرس واخذها..!

ام عوق\ اي بالله اشهر عرسك وشل حرمتك محديردك ..

عوق بنفسها\ياربي دخيلك امي وش تقول وهذا يجاريها با الكلام..!

خروف ماني آدمي يتعازمون عليه..,

ام ابراهيم معصبه \وش ها الكلام عزالله رايتس يا ام عوق ماهو راي..!

الصبح ملكه والعصر عرس والبنت ماجهزت نفسها..؟!

والتفتت ام ابراهيم لزياد\عوق ماهي رخيصه امهلهاواناعمتك اقلها شهر الجهاز يبي له وقت ..,

زياد\ لا والله محشومه عن الرخص لكن شهر كثير وانا مستعجل وراي اشغال..!

ام عوق\ عاد الحين انت والبنت شفتوا بعض ..

ترى مااحب النسيب قبل العرس يسوي له طريق سردادي مردادي خلص شغلك وخذ حرمتك..,

زياد يبتسم\ خلاص يا خاله اجل بيني وبينكم تلفون نتفاهم على تفاصيل العرس..

ام عوق \وانا بعدبيني وبينك الهرج بالتيلفونات للبنات ما احبه..؟

ضحك زياد\ يا خاله لا تسكرينها من كل جهه ..؟!

ام عوق\ يصير خير ..يصير خير

استأذنوا بشرى ونجلا وعزمتهم ام ابراهيم وقالت الليله عندنا عشا الملكه ..

واعتذروا ان وراهم اشغال وان ولد نجلا هو الي جابهم ومن اليوم واقف عند الباب ينتظرهم..,

طلع زياد معاهم وصلهم للباب الاخ صاير راعي بيت ..,

ورجع يسولف على امي ويستعجل امه وطلعوا كلهم من غرفة الجلوس..,

امي تسولف على ام زياد وهي توكى على عصاها..

وام زياد تدفها شغالتها ما ادري هي تفهم كلام امي اولا..!

وام ابراهيم قبلهم طلعت لبيتها بناتها استعجلوها..

زياد وراهم يمشي ما قلت لكم مسوي نفسه راعي بيت وماخذ راحته..

وانا ما ادري وش الي نقزني وخلاني امشي وراهم..؟!

رجع شوي زياد على وراه ..

وأشر علي شي با السقف ناظرت للي يأشرعليه وهو ويسحب شعري صرخت و بغيت اطيح..!

التفتوا علي كلهم وامي تسمي علي ما يدرون وش جاني وزيادكاتم ضحتكه..,

لو ماكانت امي وامه واقفات كان يمكن ذبحته على خباله...؟!

كبر جدي وكنه بزر ذكرني في بنت ريم اذا شافتني جادله شعري تجلس وراي وتلمس شعري..

طيب هذيك بزر ويلعب هذا وش جاه بسم الله..؟!

الله العالم ان مخه فيه بلا وهذا الي ماخلاه يعرس الاوهو كبير..!

سبحان الله مافيه شي كامل مزيون وعليه قل صح..!؟

طلعوا ورجعت انا وامي يارب ما تشوف فستاني من ورى..؟!

دخلت غرفتي وانا امشي على وراى وجات سلامات..!

غيرت لبسي واتلمس راسي يوجعني من سحبته...ّ!!

طلعت لأامي بسرعه خفت من تعليقها علي لقيتها منسدحه على فراشها..!

عوق بخوف\ تحسين بشي يمه..

ام عوق بوهن\لا بس ابي ارتاح شوي اليوم تعبت مبطيه عن المشي الواجد

عوق \ما شاء الله يمه اليوم رجعتي شباب خفت انك تتعبين يوم طلعنا للمحكمه..؟

وضحى بفرحه\تدرين ياعوق ان الي مشيني اليوم قلبي من فرحتي فيتس..

يمكن لو قايلين تعالي يا وضحى للمحكمه مشي جيتهم ركض ..!

عوق تحضن وضحى بحب\ لبا قلب ميمتي عساها دايم افراحتس ..!

وضحى وهي تبعد عوق عنها \هاه وش رايتس باالرجال..؟

عوق بتهكم\ماشي حاله اهم شي انه معجبتس ما انتبهت له زين ..!

وضحى وهي تقرص عينها وتهز راسها\صادقه ماشي حاله الا ازين من خشتس ما شاء الله عليه ..,

عوق با انفعال\بالله وش به من الزين طويل يروع طوله ونحيف ماله شبيه الا عمود الكهرب ..

ومعروف كل طويل هبيل ومع ها اللحيه الي مدري كيف حالقها والا ...؟!!

وضحى\على هونتس على هونتس هذا وانتي منتي منتبهه..,

دافع البلا قطعتي الرجال والله كله ما مثله بس اسمه شين لو اسمه زايد والا مزيد كان ازين..!

عوق بتوتر\يمه بقولتس شي..؟

وضحى با استغراب\خير...!

عوق \ يمه امه شكلها اجوديه وتدخل القلب الله يرفع عنها...,

لكن الحرمتين الثانيات ما تريح وجيهن خايفه منهن يسوون لي مشاكل معه...!

وضحى\وانتي وش عليتس منهن تريح والا ما تريح وجيهن ..!

اهم شي امه الضعيفه راعي الله فيهاوالحريم ما عليتس منهن..

الحرمه لا بغاها رجلها والله لو كل الناس تجتمع تبي تخرب عليها ما قدرت..!

وان عاد نفرها والله انها على جريف ادنات ماطيحها..

وبعدين هن حريم كبار ومعرسات عندهن ما مكفيهن ماهن فاضيات بس يدوخن راس عوق..؟!

وانتي بعد اشغلي نفستس بالي ينفعتس ..,

واتركتس من الظنون والتفاكير ومراقب خلق الله مامنه فود..,

ماتسمعين المثل الي يقول من راقب الناس ما تهنى ..!

عوق بضحك\ يمه مااااات همآ مات همآ

ام عوق بحزم\ عاد الي هو ..؟!

انتي مالتس الا بيتس ورجالتس وباقي الناس سلام عليكم السلام ..

لا تجسرين احد عليتس وكثر المزوح تراها تضيع الهيبه ولا تخلين احد يدري وش وراتس ...

ورجالتس لا تقطعينه من اهله ترى لتس با المثل ..

عوق بشرود\يصير خير يمه ..,

عوق بنفسها\الله يستر من حياة فايزه وصالح لكن بشكل ثاني...!؟

وقمت اصلي المغرب وارتاح شوي بطيح من التعب..,

صليت وانسدحت ما ادري با الدنيا وصحيت على دق باب غرفتي..؟!

ريم جايه وجايبه معاها عشى لي ولأمي ..

ريم با استهزاء\ اصحي عروس ونايمه المفروض الحين اجي القاتس بعالم ثاني ..

اشوف عيونتس بسم الله بتنفقع من النوم..؟!

توقعت اشوف قلوب حمر ورديه..!

عوق بتعب\تكفين ريم خليني انام احس لي الف سنه مانمت..,

ريم\اقول الليل طويل تنامين لكن اقعدي عطيني التفاصيل امي وخواتي ما بردوا قلبي..!

عوق بخمول \اذن العشا

ريم\ مبطي فاضوا من الصلاه كان ما صليتي يا الله قومي صلي وانتظرتس شوفيني عند خالتي ..

راحت ريم عند امي وانا صليت وطلعت لهم حضرت عشى امي وتعشينا..

عقبها امي قالت انا ابي انام وانتن يمكن عندكن سوالف ما تصلح للعجايزالي مثلي..!

ادخلت لغرفتها واناو ريم لغرفتي..

ريم \ياالله جيبي اخبارتس وش رايتس با المعرس ..؟

عوق\والله ماعليه المعرس شكلآ لكن ماهو صاحي تحسينه ملحوس بسم الله ..؟!

ريم بتعجب \ياربي سترك دكتور وملحوس وشلون تجي..!

عوق\تخيلي كنه بزر والله ما ذكرني الا بنتس يوم تجي وتجلس وراي وتمسك شعري..

حتى بنتس ارحم منه هو ماغير يمعط شعري ..,

وزاده يوم جا يطلع مع اهله سحب شعري سحبه حسيت عيوني طلعت من محلها ..,

تخيلي للحين يوجعني راسي ما اقدر المسه والله ان عليه قل صح وقولي عوق ما قالت ..

ريم بتعجب\ والله غريبه المفروض يوم شافتس قعد يمدح فيتس ماهو لعب بزران طقني واطقك..!

اردفت ريم بضحك\صدق عوق اعجبتس شكله...!

عوق بتهكم \ليش ما تعرفين شكله ويوم تقولين البسي كعب طوله متر..!!

ريم بضحك\انا شفت له صور مع جزاع ونواف شكلها قديمه مالفتني غير طوله يروع..,

خواتي منهبلات عليه يقولون ماشاء الله ماحسبنا عوق بتلقى الي يناسبها وربي سبحانه جمعهم قدر ولقى غطاه..,

عوق بتوتر\ خايفه ياريم..؟!

ريم با استغراب\بسم الله وش يخوفتس لايكون طقنتس خواتي عين..!

عوق \الله يصلحتس وش طقني بعدانتي انامن فضل ربي ما انسى اذكاري واحصن نفسي من ها الناحيه ارتاحي..,

لكن احس ما ادري ما ادري كيف اشرح لتس..؟!

حياه جديده وارتباط وفوق هذا امي ما اقدر اتصور يمر يوم ما اشوفها فيه..,

وهو بعد على ما سمعت ان امه عنده..!

ماهو معقوله هو بيعيش معي هنا اناوامي ..

وامه تجلس با الحالها وامي ما راح تترك بيتها وتجي معي احس اني بورطه..؟!

ريم\هذي بتلقون لها حل ان شاء الله اذا تفاهمتم كل شي ينحل

ريم بضحك\الا الورطه الي بغت خالتي وضحى تورطكم تبي الرجال يشيلتس الليله..!

يا انا ضحكت على امي يوم علمتني ..,

تقول الرجال طارت عيونه مير ماعنده مانع من صدقه يبي اليوم..!؟

عوق بتهكم\ لا ما شاء الله عليه يوم قالت خالتي نوره شهر كنه ما اعجبه..,

ريم تضحك\هو وش جاه بغى يطيح با التورتة تقول امي شكل عوق اعجبته الضعيف ماعاد يجمع..!

عوق بتهكم\ابشرتس كيكة حماتس على محلها محد حركها..!

قعدت على طاولتها لين مشواوالله ماحركها الا يده يوم بغى يطيح..

ريم \يا ويلي عنك يا نواف ان درى ان كيكته مالمست غير ينجلط ..

من صبح وهو مشتط الضعيف يدور لزياد المحلات الزينه..!

عوق بحيره\بالله ريم وش بسوي ما ني عارفه من وين ابدى..؟!

ريم\ وش منين تبدين ...!

عوق \اقصد الجهاز...

ريم\الحين اول شي بنشوف العرس كيف بيسوونه حفل كبير والا عايلي..!!

عوق\وش حفل كبير والا صغير تعرفين نظريتي لزفة العروس لا يمكن اطلع لناس..,

ريم بحالميه\با العكس عوق وش العرس بدون زفه وتمشين بين الحضور والكل يشوفك

بصراحه لو جزاع يطيعني كان تزوجته مره ثانيه وانزفيت بعد ونفوله واخوانها يرمون علينا ورود..,

عوق بممازحه\والله انتس فاضيه كل كلمه والثانيه جزاع وياليت بس سمعت بجزاع ولا شفته..!

ريم\يويلتس من ربي ياعوق جزوعي والله ما مثله..؟!

عوق\الله يخليه لتس ويزينه في عينتس ويزينتس بعيونه ..,

ريم\لاما عليتس والله يشوفني ملكة جمال ..,

تخبرين خواته الله يصلحهن ماهنا زين..,

وعاد انا مصوره له ان خواته اجمل بنات الجماعه..

والضعيف مصدق وهن طايرات با العجه ..

هن عارفات اني ازين منهن ولا يقدرن يقولن في احد ازين من ريم..

يكسر كبريائهن بما انهن جميلات ..,

عوق بضحك\ ياحبي لتس ياريم ما تفوتين شي كل شي ما شاء الله تخليهن لصالحك..,

ريم\اجل وش اسوي تبين الناس تاكلني وانا حيه ..!

عوق بحيره\المهم خليني من علوم جزاع واهله..

انا وش اسوي كيف اجهز..؟!

ريم بتساءل\ عطاكم المهر..؟

عوق\ ما شفت شي يمكن عطوا امي بس ماقالت لي ..!

ما شفت الا الشبكه ...!

ريم \ شوفي ما يبي لها بنبدا من بكرا تحسب لأي طارئ..؟!

الحمدلله سواقكم موجود وانتي عندتس فلوس تقضين فيها شغلتس لين يجيبون المهر

اذا هو ماعطى خالتي وضحى شي..!

وبننتشر انا وخواتي با الااسواق ..

والا نسيتي ما شاء الله انا وانتي وخواتي سبع وهن بس يبون يخدمونتس ..

ولا يغرتس ترى والله يعرفن كل شي..!

بنات الحين بسم الله الدش ماخلى شي يعني لا تقولين هذا موضته قديمه والا هذا ما يصلح..؟!

وبعدين انتي بسم الله عليتس يصلح لتس كل شي تلبسينه..؟!

مقاسك متوفر وين ما تروحين ما تبلشين با المقاس ..,

ولا تكثرين كنتس رايحه لصحراء جرداء..!

تسوين الي سويته بلشت بجهازي ما خليت ولا بقيت..

وابوي الله يطول بعمره ما يبي يكسر خاطري وامي ماتبي ام جزاع تمسك عليها شي تدرين وش اخرتها..؟!

جهازي على كثره طلعت فيه خالتي ام جزاع عيوب..!

تقول حرمة جزاع كنها ماهي شايفه خير شاريه جهاز ياربي لك الحمد يكفي قبيله بالله يا عوق هذا كلام..!

عوق بتعجب\غريبه ام رجلك..!

ريم \رضا الناس غايه لاتدرك..؟

امسكي ورقه وقلم واكتبي الي تحتاجينه..؟!

تخيلي نفسك في بيتك عند رجلتس وشوفي من تصبحين لين تنامين واحسبي حساب الزيارات الي بتروحونهااو تمشيه..!

وش الي تحتاجينه لبسك مكياجك عطوراتك اكسسوراتك..,

وكل الي تبينه لو ابره وخيط اكتبيه با المعقول خوذي لبس ست شهور..,

انتي عارفه الشتاء ست شهور والصيف ست شهور..,

يعني مافي يا نفطس حر يا نفطس برد..

عوق بضحك\ يا زين البرد على الحر...

ريم\ الله يرحم والديتس العطور لاتكثرين كل ما اتذكر خيبتي ودي اصيح ..,

تخيلي قشيت عطور ومكياج كميات ما يعلم فيها الا الله ..!

خبرك رايحه لصحرا الربع الخالي لا بعد يمكن فيه اسواق هناك..

انا الظاهر احسب اني بعيش بجزيره مقطوعه عن الدنيا..؟!

المهم المكياج طلع جزاع ما يهمه المكياج وحتى يقول ريم ترى وجهتس الطبيعي ازين..

لا تعذبين نفستس بها الالوان والعطور ..؟!

حملت بعد عرسي بشهرين كرهت الشقه كلهاماهو بس غرفتي من ها العطور..

تخيلي شلتهم وانا رابطه خشتي بطرحه واجمعهم بكيس زباله..

واعطيهم خواتي تكفون بس فكوني منهم حرام ارميهم وهي كلها عطور غاليه..!

وبعد ماكانوا خواتي يترجوني علشان ياخذون من عطوراتي صرت اترجاهن بس يفكوني منها..!

عوق\ومنكم نستفيدخلاص شورك وهداية الله ..

ريم كلامك صدق لكن لاتنسين اهله احسهم غيرنا محتاره..,

وامه والحريم كشخه وذوق لو شفتيهم وهذي كشختهم وهم عارفين ان مافي احد بيجي لشبكه..

وانا تخبريني ما احب اكون بمحل انتقاد اذبح نفسي ولا اسمع من احد كلمه توجعني...!

ريم \اسمعي خلك من الحساسيه الزايده اهم شي حطي بين عيونك رضا الله سبحانه وبعدها كل شي يهون...,

لا تحاولين تتعبين نفسك برضا فلان وعلان خوذي الحياه ببساطه ..

عوق \الله يستر والله بديت اخاف من قلب امي من الحين معه ضدي..

ريم \ خالتي ماعليتس ما يخفاها شي وقت الجد بيتغير الهرج عسى الله لايجيب خلاف بينكم..,

شوفيني انا ترى خالتي ام جزاع ما تنعاشر ناركبرى..!

لكن عايشه با التطنيش اهم شي جزاع معي والباقي بسلامته ..

تدرين ان خالتي ام جزاع من النوع الي اذا سولفتي معها بلشتي وان سكتي بلشتي..؟!

وجربت كل الطرق اذا جلست معها وسولفت وضحكت قالت الله يعينك يا جزاع على ام اللسان..!

واذا سكت قالت من حاشي راسها علينا..!

واذا شكيت لجزاع قال هذي امي السوق ما يبيعون فيه امهات والا كان شرينا..!

مالتس الا تحملينها انا ما ابدلتس ولا ابدلها ..,

تدرين با الاخير وش سويت ...؟!

عوق بدهشه\لاتعليق بعض المواقف لايصفها الالصمت..,

ريم\ لا والله الا اجي واجلس واسولف واضحك معهاولا اخلي وحده لمحتها خالتي معي جالسه تسولف..,

الا قلت يا خاله لو تسمعين مدح فلانه وعلانه فيتس الناس حاسديني ان عندي خاله مثلتس..!

وتشوفين كنها شوي اعتقتني عرفت لها جيتها عن طريق المدح..,

حتى جزاع يوم اقوله يشجعني يقول جزاتس الله خير الانسان اذا كبر يزعل ويتشره بزود عاد انتي استحمليها...

عوق\ تدرين ريم ما اقدر اسوي مثلتس يمكن اشيل قشي وامشي لواحد بيجرحني والا يحاول يقلل من قدري..

ريم\ بتغيرين يا عوق الكلام على البر غير التجربه

المهم الحين طولت عندتس وانتي خابره عيالي صياحهم واصل اخر الدنيا..!

بروح وانتي خلصي امورك تحسبآ لكل شي ومثل ما قلت لك لايردك الا لسانك اي شي تبينه..,

ولاتنسين ورقه وقلم ترى القلب ماهو كتاب سجلي طلباتك ..,

طلعت ريم من عندي ها البنت الي يشوفها غير الي يقعد معاها..!

سبحان الله ام جزاع فيها كثير من ام صالح ..!

ريم ماهي اذكى من فايزه علشان قدرت تستمر مع جزاع ..!

لكن الفرق بين جزاع وصالح جزاع ماسك العصى من النص وقادر يرضي الكل ..,

عكس صالح الي يتم اطفاله وهو حي..,

رجعت لغرفتي وانا براسي الف شغله وشغله ..,

وامي الي ما ادري كيف بيكون وضعها ..ّ!؟

غير الجهاز الي ما ادري من وين ابدا فيه..؟!

والله مالي الااسوي الي قالت لي عنه ريم ..,

خلاص الله واكبر وش المشكله كلها عرس ..!؟

ويعني من وين جاي زياد من كوكب ثاني..!!

" اللهم لا سهل إلا ما جعلته سهلا و أنت تجعل الحزن إذا شئت سهلا "

نمت على افكاري وصحيت على صلاة الفجر..!

صليت وطلعت لأمي الي مثل عادتها تصلي صلاتها وتجلس بمكانها تسبح وتستغفر..!

حبيتها على راسها..!

عوق\يا صباح النور على المهاالوضيحي ..,

وضحى\هلا بعوق المزايين ماشاء الله اليوم قايمه من صبح ما يحتاج ادق باب غرفتس لما تكل وتمل يدي يالله تقومين..!

عوق\لا يمه بس نمت بدري..,

وضحى\اجل ما طولت رويم عندتس ..!

عوق\لا شوي وطلعت يمه بغيتس بسالفه..؟!

ام عوق با اهتمام\عساه خير..!

انتظري بزين فطورنا وقهوتنا علشان تزين السوالف ...!

صلحت الفطور وجلست عند امي و صوت عبد الباسط عبد الصمد يصدح في بيتنا عادةامي الصباحيه من عرفت الدنيا..,

احس صباحنا ناقص اذا ما سمعت تلاوته اوتلاوة محمد ايوب ...,

ام عوق\ يالله وش هي السالفه الي عندتس ..؟ّ!

عوق منحرجه\ ماادري وش اقولتس ..؟!
.
.
.

(كلمه اخيره)


?يآهل الكريسمس ..؟!


في الكريسماس سيحتفل أكثر من 200 مليون
إنسان بعيد ميلاد ابن الله ?

(وقالت النصارى المسيح ابن الله)

والله يقول: (ما اتخذ الله من ولد)

في الكريسماس يقوم "سانتا كلوز" أو بابانويل بتوزيع الهدايا بمناسبة عيد ميلاد ابن الله ?

(بديع السماوات والأرض أنى يكون له ولد ولم تكن له صاحبة)

اسأل أصغر عيالنا.. وش حافظ حبيبي ؟

يقولك: ( قل هو الله أحد- الله الصمد- لم يلد ولم يولد- ولم يكن له كفواً أحد)

ويقولون عيد ميلاد ابن الله ?

حتى الجن يعلمون أنه ليس لله ولد !!

(وأنه تعالى جد ربنا ما اتخذ صاحبة ولا ولدا)

يقول الله:
شتمني ابن آدم وما ينبغي له أن يشتمني..
أما شتمه إياي فيدعي أن لي صاحبة وولداً
وأنا الله الأحد الصمد.. ما اتخذت صاحبة ولا ولداً

المخلوق اللي اسمه إنسان يشتم الله ?

ويقولون اشفيها:
هابي نيو يير.. ميري كريسماس ?

سلامتكم
ما فيها الا موافقتك على شتم وسب الله


* اصحو يا [ مسلمين ]
.
.
.

الي الملتقى قريبآبأذن الله

  رد مع اقتباس
إضافة رد

مواقع النشر (المفضلة)

الكلمات الدلالية (Tags)
الحمام , امها , جميلة , رواية , وود , كاملة


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة


المواضيع المتشابهه
الموضوع كاتب الموضوع المنتدى مشاركات آخر مشاركة
رواية حب جميلة , أحبك حتى لو بات حبك في قانون البشرية محرما ملوكاا روايات كامله ، روايات طويله ، روايات رومانسيه ، روايات حزينه ، روايات جديده 4 2014-10-13 10:42 PM
رواية طويلة , رواية أحببتك كطفلة/ كاملة ملوكاا روايات كامله ، روايات طويله ، روايات رومانسيه ، روايات حزينه ، روايات جديده 29 2014-10-11 01:53 AM
رواية مكتوب بحياتي و رضيت فيه / كاملة ملوكاا روايات كامله ، روايات طويله ، روايات رومانسيه ، روايات حزينه ، روايات جديده 8 2014-10-11 01:52 AM
رواية يعذبني و إستحملت عذابه لين إعترف بحبه لي / كاملة ملوكاا روايات كامله ، روايات طويله ، روايات رومانسيه ، روايات حزينه ، روايات جديده 24 2014-10-11 01:52 AM
رواية بين إيديا / كاملة ملوكاا روايات كامله ، روايات طويله ، روايات رومانسيه ، روايات حزينه ، روايات جديده 43 2014-10-11 01:51 AM


الساعة الآن 03:03 AM.


Powered by vBulletin® Version
Copyright ©2000 - 2018, vBulletin Solutions, Inc. seo by : www.resaala.net
Search Engine Friendly URLs by vBSEO 3.6.1
دعم Sitemap Arabic By